Sámi jurista Gro Dikkanen lea nammaduvvon stivraláhttun Norgga ođđa našunála olmmošvuoigatvuođa ásahussii. Son lea gealdagasas ja dadjá dehálažžan áimmahuššat sápmelaččaid ja eamiálbmogiid vuoigatvuođat.
Sámi jurista Gro Dikkanen lea nammaduvvon stivraláhttun Norgga ođđa našunála olmmošvuoigatvuođa ásahussii. Son lea gealdagasas ja dadjá dehálažžan áimmahuššat sápmelaččaid ja eamiálbmogiid vuoigatvuođat.
Ođđa olmmošvuoigatvuođaásahus ásahuvvo suoidnemánu 1. beaivvi, ja galgá earret eará sihkkarastit ahte Norggas áimmahuššet sámiid vuoigatvuođaid. Našunála ásahusa láhka geatnegahttá ahte ovtta stivrraláhtus galgá sámi gelbbolašvuohta. Sámi jurista Gro Dikkanen lea nammaduvvon stivrii njealji jahkái.
– Mun lean gealdagasas go lean beassan dán ámmáhii, ja šaddá gelddolaš álgit doaimmain, lohká Dikkanen.
Sámeriekti dehálaš
Olmmošvuoigatvuođaásahus lea Stuoradikki vuollásaš orgána mii galgá ovddidit ja suddjet olmmošvuoigatvuođaid vuođđolága, olmmošvuoigatvuođalága, internašunála soahpamušaid ja álbmotrievtti vuođul. Stivrii nammadit jođiheaddji, nubbinjođiheaddji ja golbma stivraláhttu. Sis galgá iešguđetlágan gelbbolašvuohta juridihkalaš olmmošvuoigatvuođamáhtus ja doaibmastivremis. Gro Dikkanen lea guhká bargan juristan ja sámeriekti lea guovddážis su oahpus.
– Stivra galgá buotlágan olmmošvuoigatvuođa áššiiguin bargat, mun dovddan sámi- ja álgoálbmotsuorggi buoremusat ja beroštan dán suorggis. Lea diehttelasat hui dehálaš sihkkarastit sámiid ja álgoálbmogiid rivttiid, lohká Dikkanen.
Nana gelbbolašvuohta
Jurista Gro Dikkanen joatká iežas virggis Finnmárkkukommišuvnna hálddahuslaš jođiheaddjin. Sus lea bargohárjáneapmi maiddái Sámedikkis, son leamaš prošeaktajođiheaddjin Davviriikkalaš sámekonvenšuvnna barggus ja lea bargan sis-Finnmárkku riekteveahkkekantuvrras. Gáldu álgoálbmotvuoigatvuođaid gelbbolašvuođa guovddáš, mii maiddái galgá oassin ođđa olmmošvuoigatvuođaásahusas, lea duhtavaš sápmelaš stivraláhttuin.
– Gáldu bealis sávvat mii olu lihku Gro Dikkanenii su doaimmain sámi áššiid ovddideaddjin olmmošvuoigatvuođaásahusa stivrras. Mun jáhkán sus lea rievttes oahppu ja maid nanu bargovásáhus mii boahtá vissásit ávkin earáide stivrras, lohká Gáldu direktevra Laila Susanne Vars preassadieđáhusas.
