-Almmuhus-
KULTUVRADiimmá SGP vuoitit geasuheigga gehččiid

Diimmá SGP vuoitit geasuheigga gehččiid

-

-

 Ledje ollu olbmot ledje boahtán guldalit go diimmá SGP juoiggaiga ja lávlluiga guhkesbearjadaga. Geahča videoid ja govaid!

Johan Ivvár Gaup ja Ella Marie Hætta Isaksen/ISÁK rabaiga guhkesbearjadaga konseartta Báktehárjjis, ja soai gal geasuheigga ollu gehččiid.

Ledje ollu olbmot boahtán geahččat go Gaup ja Hætta Isaksen doalaiga iežaska vuosttaš konseartta Báktehárjjis.

Vuolimusas beasat geahččat govvagalleriija.

 

Earenoamáš čuoččut lávddis

Gaup muitala áhte lei hirbmat somá oaidnit go dat olbmot geat ledje boahtán orro liikomin su konsertii ja muhttin vel juoiggastii ge maid fárrui.

Ja sutnje lei hui earenoamáš ja somán čuoččut lávddi alde doallat iežas konseartta.

 

Luohte berošteaddji

Gaup lohka áhte artistta boahtte áiggis livčče su niehku, go lea hirbmat somá čuojahit lávddi alde. Niehku livčče maiddai skearru ráhkadit, muhto ii loga vel iežas nu guhkas jurddašan.

– Luđiid juoigat lávddi alde lea niehku, go mun lean hui luohte berošteaddji. Beassat lávddi alde juoigat lea munnje hui dehálaš, ja hui somá go ožžon dan vejolašvuođa.

 

Veaháš balus vuosttáš konsearttas

Gaup lea hirbmat duhtavaš konsearttain, ja ii loga jurddašan áhte na bures dat boahtá mannat.

Son lohka áhte diehttelas go lea vuohččan lávddi alde, ii ge nu hárjánan doallat konsearttaid de lei veaháš balus álggos muhto lohka áhte manai lihka hui bures.

 

Energiija čoahkkanan

Elle Marie Hætta Isaksen lohka iežas konseartta oalle «crazy», go lei nu somá.

Go son lea nu guhka vuordán ovtta konseartta, ja go de lávkii lávdái de lei ollu energiija mii lei čoahkkanan su sisa.

– Lei jalla buorre dovdu mus.

 

Diggeje su konseartta

Hætta Isaksen ii loga iežas diehtán maid sáhtii vuordit konsearttas, ja sutnje lei hui somá boahtit lávddi ala go oinnii man ollu olbmot ledje boahtán ja diggeje su olles konseartta.

 

Álgu su niegus

Ella Marie ii loga iežas agibeaivvis ge doivon áhte sus boahtá leat dakkár prošeakta mainna sáhttá leat nu rámis ja mainna son diehtá áhte háliida joatkit viidáseappo.

– Mus leat ollu niegut maid háliidan ollašuhttit, ja dat lea dego álgu mu niegus. Dál lean rievttes geainnu gávdnan ja dat dovdu lea hui buorre.

 

Somá goappašagaid oaidnit

Sámi musihka festivála buvttadeaddji Ol-Johan Gaup lohka iežas mielas hui somán oaidnit goappašagaid go čuojaheaba lávddis.

– Nu go oinniimet de birgii Ella Maria hui buores Liet gilvvus, ja Johan Ivvára oinniimet maid áhte lea bures bargan ja rahkánan bures dasa.

 

Dárkilit bargan diimmá rájes

Johan Ivvár ja Ella Maria leaigga bures rahkánan eahkedii. Ol-Johan lohka áhte soai leaba bures ja dárkilit bargan diimmá rájes sudno musihkain.

-Almmuhus-