Dat lea eambbo go ovddit jagiid, 2020 ja 2019.
Go leat lagabui 160 000 vuodjingeahččaleami čađahuvvon de álgá vuordináigi daidda máŋgga báikkis fas šaddat dábálaččan, birrasii njeallje vahkku. Maŋemus beaivvi 2022:s ledje oktiibuot 157 970 vuodjingeahččaleami čađahuvvon buot luohkáin. 79 % dain cevze.
– Leat ain oallugat vuordime beassat váldit dákkár geahččaleami stuorát gávpogiin, muhto mii bargat geahččalit oanidit vuordináiggi sihke doppe ja muđui riikkas. Sensorat leat čađahan geahččalemiid sihke eahkediid ja vahkkoloahpaid, ja leat veahkehallan maiddái daid riikkaosiin gos lea leamaš dárbu dasa, dadjá Stáda geaidnodoaimmahaga ossodatdirektevra Heidi-Kristin Herbst preassadieđáhusas.
– Mii leat čađahan 5840 eambbo vuodjingeahččaleami 2022 go jagi ovdal ja 18 570 eambbo go 2019, dadjá Herbst, gii lasiha ahte 2019 lei maŋemus dábálašjahki ovdal pandemiija váikkuhišgođii. Koronapandemiija dagahii ahte eambbosat áigo vuodjinkoartta, ja dat dagahii ge guhkes vuordináiggi daid maŋemus jagiid.
2944 vuodjingeahččaleami Finnmárkkus
Stáda geaidnodoaimmahaga sensorat čađahedje 2944 vuodjingeahččaleami Finnmárkkus vássan jagi. 89 % dain cevze.
4135 olbmo válde teoriijageahččaleami muhtun johtolatstašuvnnas fylkkas seamma áiggi. 65 % dain nagodedje geahččaleami.
