-Almmuhus-
-Almmuhus-
SMÁVVAOĐĐASATDiibmá lassá­nedje heavvanan­logut 17 proseanttain

Diibmá lassá­nedje heavvanan­logut 17 proseanttain

-

-

2022:s heavvanedje 88 olbmo Norggas. Go buohtastahttá jagi 2021 loguin, go 75:s heavvanedje, de leat heavvananlogut lassánan 17 proseanttain.

Logut leat vižžon gádjunfitnodaga Redningsselskapet heavvananstatistihkain.

Muđui ledje gávcci norgalačča mat heavvanedje olgoriikkas. Gádjunfitnodaga váldočálli Grete Herlofson muitala ahte olbmot heavvanit dávjá fatnasiin, go vuojadit ja go gáttis gahččet čáhcái. Heavvananáššit dáhpáhuvvet mearas, jávrriin, jogain ja basseaŋŋain.

DÁRBBAŠIT DOAIBMAPLÁNA:  Gádjunfitnodaga Redningsselskapet váldočálli Grete Herlofson lohká dárbbašit čielga eastadanplánaid heavvanemiid vuostá. Govva: Redningsselskapet
DÁRBBAŠIT DOAIBMAPLÁNA:  Gádjunfitnodaga Redningsselskapet váldočálli Grete Herlofson lohká dárbbašit čielga eastadanplánaid heavvanemiid vuostá. Govva: Redningsselskapet

– Mii dárbbašit sihke almmolaš áigumuša bissehit buotlagán heavvananlihkohisvuođaid ja nationálalaš doaibmaplána eastadandihte heavvanemiid, lohká Herlofson.

Earenoamáš olu heavvaneamit juovlamánus

Mannan mánu ledje gávccis geat heavvanedje, ná oallugat eai leat juovlamánus heavvanan 25 jahkái.

Njealjis dáin heavvanedje go gáttis leat gahččan merrii dahje jávrai, ja guovttis dušše go doddjuiga jieŋa čađa skuhteriin. Okta duššái fatnasis, ja okta vel duššái go tráktorin geavai merrii.

Čiežas dáin ledje dievdoolbmot.

– Dábálaččat lávejit juovlamánus leahkit unnán heavvaneamit, nu ahte dál ledje eanemus heavvaneamit juovlamánus 1990-logu rájes, lohká gádjunfitnodaga Redningsselskapet fágalaš hoavda Tanja Krangnes.

Gádjunfitnodat lasiha ahte 60 proseantta heavvanemiin dáhpáhuvvet čakčat ja dálvet.

– Olmmoš oažžu galmmasvuođas šohka go dálvet geavvá čáhcái. Jus dalle oaččo panihka ja njielada čázi, de lea stuora riska heavvanit.

Eatnasat geat fatnasis dušše ledje badjel 40 jagi boarrásat

Heavvananlogut astoáigefatnasiin lassánedje 28 proseanttain diibmá. Buot riikka fylkkain ledje dakkár lihkohisvuođat.

Dasa lassin ledje guokte mana vuollel 14 jagi geat heavvaneigga astoáigefatnasis. Dat lea vuosttaš geardde guđa jahkái ahte mánát duššet lihkohisvuođain astoáigefatnasiin.

Muđui ledje vihtta dievddu geat dušše fidnofatnasiin, buot dat lihkohisvuođat dáhpáhuvve Davvi-Norggas.

Eambbosat gáhččet gáttis

Golbmalogiguovttis dušše maiddái go gáttis gevve čáhcai, dakkár lihkohisvuođain lea 33 proseantta lassaneapmi 2021 rájes. Dát lihkohisvuođat dáhpáhuvve earret eará meahcasteami ja oagguma oktavuođas.

Guokte máná vuollel 7 jagi duššaiga go gáttis gahčaiga čáhcái.

Ovcci dievddu ja okta nisson heavvanedje vuojadeami oktavuođas, seamma olu go 2021:s. Dábálaččat lávejit mánát, nuorat ja vuorrasat eanemusat heavvanit vuojadanlihkohisvuođain, muhto diibma ledje 60 proseantta dáin gaskal 26 ja 60 jagi boarrásat. Muđui ii duššan oktage mánná vuollel 15 jagi vuojadeami oktavuođas.

Eatnasat leat badjel 60-jahkásaš dievddut

42 proseantta sis geat heavvanedje ledje badjel 60 jagi boarrásat, ja measta buohkat dáin ledje dievddut. Dát ahkejoavku lea álgán lassánit heavvananstatistihkain.

– Dát sáhttá mearkkašit ahte dán áigge pensionisttat lihkadit eambbo go ovdalaš buolvvain. Muđui sáhttá maid leahkit nu ahte oallugat eai váldde vuhtii ahte gorut rievdá áiggi mielde. Balánsa ja reakšunnávccat hedjonit, seammas go deahkit geahnohuvvet.

Krangnes muitala ahte lea bággu bures dustet dán ahkejoavkku eastadandihte heavvanemiid.

Heavvananlogut fylkkaid mielde

Vestlánda: 16 olbmo

Viken: 12 olbmo

Vestfold ja Telemark, Agder, Trøndelag: 8 olbmo

Nordlánda, Romsa ja Finnmárku: 7 olbmo

Møre ja Romsdal, Innlandet: 6 olbmo

Rogaland: 5 olbmo

Oslo: 4 olbmo

Svalbárda: 1 olmmoš.

-Almmuhus-