2021 buollinjápminstatistihkka čájeha ahte 41 olbmo dušše buollima geažil Norggas, mii lea uhcit go 2020:s, go 45 olbmo masse heakka buollima geažil.
Dan čájehit Servodatsihkkarvuođa ja gearggusvuođa direktoráhta (DSB) logut.
Diibmá dušše oktiibuot 41 olbmo buollima geažil, 23 almmáiolbmo ja 18 nissonolbmo. Njealjis dain duššan olbmuin ledje mánát vuollel 16 jagi, čállá Brannvernforening preassadieđáhusas.
– Vaikko dušše uhcit olbmot buollima geažil, de lea dattetge lohku menddo badjin. Ii livčče oktage olmmoš galgat duššat buollima geažil, ja erenoamáš váivi go mánát duššet, lohká Norsk Brannvernforening dahje Norgga buollinsuodjalansearvvi hálddahuslaš direktevra Rolf Søtorp preassadieđáhusas.
Maŋimus logi jagis (2012-2021) leat 422 olbmo massán heakka buollima geažil. Gaskamearálaš lohku dán logi jagis lea 42,2 olbmo. Ovddit loge jagi áigodagas (2002-2011) dušše 633 olbmo buollimiin, mii lea gaskamearálaččat 63.3 olbmo.
Søtorp lohká jus buohkat mihttomearálaččat barget, de lea vejolaš geahpedit buollimiid, muhto dat gáibida guhkit áiggi barggu, dárkkistit ahte buollineastadeamit doibmet, maiddái gielddaid riskajoavkkuide nu mo boares olbmot ja eará rašis joavkkut.
