Diibmá eai heavvanan nu olu olbmot go gaskamearálaččat leat ovddit jagiid dahkan. Norsk Folkehjelp veahkkeorganisašuvdna ain ávžžuha olbmuid geavahit gádjunveastta, vaikko lohku lea njiedjan.
Diibmá heavvanedje 91 olbmo Norggas. Norsk Folkehjelp veahkkeorganisašuvdna lea daid maŋemuš 29 jagiid čohkken loguid, ja gaskamearálaččat leat 121 olbmo heavvanan juohke jagi. Dat mearkkaša ahte lohku lea njiedjan.
– Vaikko mii sávašeimmet unnit lihkohisvuođaid, de leat dát ilolaš logut. Lea váttis diehtit juste manne logut njidjet, muhto jáhkán ahte lea danne go servodagas lea eanet fuomášupmi sihkarvuhtii, lohká Norsk Folkehjelp gádjunbálvalusa ovttadatjođiheaddji Jon Halvorsen.
Finnmárkkus heavvanedje viđas
49 proseantta heavvanemiin, mat 2016:s dáhpáhuvve, gevve go olbmot gahčče gáttis čáhcái. 17 proseantta dáhpáhuvve astoáigefatnasa geavaheami oktavuođas.
Rogalánddas ja Møre ja Romsdalas ledje eanemus lihkohisvuođat. Goappá ge fylkkas ledje 11 lihkohisvuođa. Hordalánddas ja Buskerudas ledje ovcci.
Finnmárkkus heavvanedje viđas, Romssas ges dušše okta. Badjelaš bealli sis geat heavvanedje, ledje rávis dievddut.
– Lea dehálaš ahte rávisolbmot maid geavahit govdunveastta. Ii dušše sihkarvuođa dihte, muhto maiddái vai leat buorit ovdagovat mánáide, lohká Jon Halvorsen.
Njealjis dušše juovlamánus
Norsk Folkehjelp ráhkada statistihkaid mediaid vuođul. Sii sávvet ahte olbmot cavgilit heavvanemiid birra, go háliidit nu rievttes statistihka go vejolaš. Logut leat sirrejuvvon fylkkaid ja agiid mielde.
