Sámediggi lea juolludan doarjaga lágidit giellakurssa rávisolbmuide digitála arenas. Sámi organisašuvnnat čájehit dás movt birget geográfalaš hehttehusaiguin go áigot ealáskahttit sámegielaid.
Dán dieđiha Sámediggi preassadieđáhusas.
Mjøsan Dajve Saemien Siebrie/Mjøsa og Omegn Sameforening lea ohcan doarjaga lágidit giellakurssa rávisolbmuide digitála arenas, ja Sámediggeráđđi lea juolludan 45 600 ruvnno dan doibmii.
Olu sámit guovllus gos Mjøsan Dajve Saemien Siebrie/«Mjøsa og Omegn Sameforening» doaibmá, leat ohcalan sámegielkurssa. Sii orrot bieđgguid iige leat nu álki searvat deaivvademiide. Dan dihte áigu Saemien siebrie ovttas E-skuvllain lágidit neahttakurssa.
– Digitála arenat leat boahtteáiggi oahpahusarenat. Oahpahus dakkár arenain addá vejolašvuođa eambbogiidda searvat kursii. Mii diehtit ahte giellaealáskahttin boahtteáiggis lea sorjavaš dás go oaidnit nationála fárrenminstariid, dadjá sámediggeráđđi Mikkel Eskil Mikkelsen (NSR).
Digitála giellaguovddážat
Dá berre leat geaidnu man guvlui bargat boahtteáiggis, čujuha Mikkelsen, namalassii ávkkástallat digitála vejolašvuođaid.
– Sámediggeráđđái lea dehálaš addit organisašuvnnaide vejolašvuođa ođasmahttimii ja háhkat vásáhusaid boahtteáiggi giellakurssaid hábmemis, seammás go láhčet giellaarenaid sidjiide geat háliidit oahppat sámegiela. Koronaroasus lean earret eará giellaguovddážiid ávžžuhan ovttasbargat digitála giellakurssaid lágidemiin, ja mus lea duohta jáhkku ahte mii boahtteáiggis oaidnit vuosttaš digitála giellaguovddážiid. Sámediggi áigu láhčit dili dasa, dadjá Mikkelsen.
Doarjja leat juolluduvvo doarjjaortnegis Giellaprošeavttat.
