-Almmuhus-
OĐĐASATDiggi álgán

Diggi álgán

-

-

Dál diibmu logis álggii diggi mas boazodoalli Jovsset Ánte Sara lea stevdnen stáhta go oaivvilda eisseválddiid mearridan alcces menddo vuollegis boazologu.

Dál diibmu logis álggii diggi mas nuorra boazodoalli Jovsset Ánte Sara lea stevdnen Norgga stáhta go oaivvilda eiseválddiid mearridan alcces menddo vuollegis boazologu. Sarai lea mearriduvvon 75 heakka alimus boazolohkun, ja Sara lea biehttalan doahttalit dán.

Iežas álggahansártnis otne, gesii Sara advokáhtta Trond Biti, ovdán siidaoasi historjjá. Das muitalii earret eará man olu bohccot leat leamaš dán siidaoasis man Jovsset Ánte Sara lea váldán badjelassii, maŋimuš 20 jagis. 

Biti geassá maid ovdán Fálá orohaga, gosa Sara gullá,  ja muitala orohaga historjjás ja boazologus áiggiid čađa. 

Dasto Biti jotkkii čilget makkár váikkuhusat sáhttet leat jus boazodoallái báhcet unnit go 200 heakka.

Biti álggaheapmái lea várrejuvvon beannot diimmu.

 

 

Ášši gieđahallo Sis-Finnmárkku diggegottis Deanus, ja diggái leat várrejuvvon golbma beaivvi, muhto jus lea dárbu de guhkiduvvo. Sara advokáhtta Trond Biti dattege ii jáhke dikki bistit nu guhká go juridihkalaš váikkuhusaid ii leat nu váttis ovdanbuktit.

Otná fáddá dikkis lea boazodoalolága 60. paragráfa mas lea sáhka boazologuin. Dan paragráfa lea stáhta geavahan vuođđun go mearridedje alimus boazologuid. Stevdnemis maid Trond Biti lea sádden diggegoddái, boahtá ovdan ahte lassin boazodoalloláhkii, de šaddet maid álbmotrievttit guovddáš fáddán dán dikkis.

 

Ferte leat riekti eaiggádit unnimusat 250 heakka

Sara advokáhtta, Trond Biti, čállá ge stevdnemis earret eará ahte dán ášši fáddá guovtteoaivilvuohta das, ahte lea go stádas lágalaš riekti unnidit su boazologu 75 heggii. Ášši guovddáš lea makkár prinsihpat gusket juste dán unnideapmái dan ektui mii lea mearriduvvon boazodoalloorohahkii.

Biti čállá ge stevdnemis ahte boazodoallolága 60. paragráfa ferte dulkojuvvot gáržžideapmin ja ahte seammamađeprinsihpaid (forholdsmessighetsprinsipp) ii sáhte ollislaččat bidjat vuođđun.

Stevdnemis daddjo ge earret eará ahte ovttaskas siidaoasseeaiggádis ferte leat riekti eaiggádit unnimus 250 heakka, ja easka badjel dan logu sáhttá áigeguovdil gorrelogu unnideapmi.

(Ášši joatká gova vuolábealde)


DEAIVVADEIGGA: Jovsset Ánte Sara advokáhtta Trond Biti ja ráđđehusadvokáhtta Ida Thue Sis-Finnmárkku diggegottis odne.
Inga Marie Guttorm

– Mearrádusat lobálaččat

Ráđđehusadvokáhtta Ida Thue lea vástidan diggái ahte stáhta áigu čuoččuhit Jovsset Ánte Sara siidaoasi boazologu mearrádusa lobálažžan. Thue čujuha iežas vástádusas stevdnemii man Trond Biti lea sádden diggegoddái boazodoallolága paragráfa 60 vuosttaš lađđasii, ahte doaibmanjuolggadusain galgá mearridit bajimus boazologu ovttaskas geassesiiddaide.

Boazologu mearrádusas galget doaibmanjuolggadusas vuođđun biddjot doaibma- ja guohtonárvvoštallamat. Dalle go boazolohku orohagas šaddá eambbo go lea mearriduvvon boazodoallolága 60. paragráfa vuosttaš lađđasa mielde, de galgá siida ieš ráhkadit unnidanplána seamma paragráfa goalmmát lađđasa mielde.

Jus siida ii daga dan, de galget buot siidaoasit unnidit gorrelogu mielde. Dan galgá Boazodoallostivra gozihit ahte dahkko.

Ráđđehusadvokáhtta Ida Thue čujuha ge ahte dán áššis lea boazolohku bajábealde dan mii lea boazodoallolágain mearriduvvon, ii ge orohat leat ráhkadan unnidanplána nu go boazodoalloláhka gáibida paragráfa 60 goalmmát lađđasa mielde. Danne leat šaddan geavahit gorrelogu mielde unnideami dán áššis.

-Almmuhus-