Greenpeace ja Natur og Ungdom leat jo golahan máŋga miljovnna ruvnno diggeáššái mii álggii disdaga Oslo diggegottis. Sáhttá duođaid boalddestit jus eai vuoitte dán ášši.
Greenpeace ja Natur og Ungdom leat jo golahan máŋga miljovnna ruvnno diggeáššái mii álggii disdaga Oslo diggegottis. Sáhttá duođaid boalddestit jus eai vuoitte dán ášši.
Disdaga meannudišgođii Oslo diggegoddi diggeášši mas birasorganisašuvnnat leat váidán stáda.
Organisašuvnnat lohket ahte 40 oljobohkanbáikki Barentsábis rihkkot vuođđolága birasparagráfa, ja dan vuođul váidet stáda rihkkon vuođđolága.
Dán rádjái leat áššegolut juo gártan guokte miljovnna ruvnno. Badjel bealli lea boahtán ruhtačoaggimis.
Váikkuheaddjin dahje noađđin
Jus vuitet ášši, de sáhttá čuohcat boahttevaš oljobohkamiidda Barentsábis, ja eará mearrádusaide mat sáhttet dagahit nuoskkideami dálkkádaga ektui.
Sáhttá šaddat lossa noađđin jus vuoittáhallet áššis.
De šaddet birasberošteaddjit máksit stáda goluid áššis. Dan dihte ii leat sihkar ahte guoddalit ášši jus sii vuoittáhallet.
Geahččalit vuoitit
– Eat mii leat vel mearridan maid dahkat. Vuojehit ášši Norgga riektevuogádaga čađa lea hui gáibideaddji, dadjá Greenpeace jođiheaddji Truls Gulowsen NTB:i.
– Muhto mii garrasit geahččalit vuoitit ášši, dadjá son.
Ášši joatká Oslo diggegottis gitta skábmamánu 24. beaivvi rádjái.
(©NTB)
