Digaštalle sámekultuvrra

– Mii leat earret eará digaštallan Båastede-prošeavtta, mas lea sáhka máhcahit historjjá, Tråante 2017 doaluid ja eará dehálaš sámi kulturáššiid. Kulturministtar Linda Hofstad Helleland ja stádačálli Bård Folke Fredriksen bures dovdaba sámi kultuvrra, ja mii vásihit ahte ráđđehus váldá sámi kultuvrra duođas, dadjá Lars Filip Paulsen. Paulsen lea Olgeža joavkojođiheaddji Sámedikkis.

Dovdá iežas sámevuođa várjaleaddjin

Kulturministara guovttos stádačálliin lohkaba sámevuođa leat oahpisin sudnuide:

– Mun ledjen Sámedikkis dalle go mearriduvvui ahte Finnmárkkuopmodat galgá ásahuvvot, dat lei stuorra vásáhus, ja dan rájes lean mun atnán iežan sámi ustibin ja sámevuođa várjaleaddjin, lohká kulturministtar Linda Hofstad Helleland.

– Mus lea lagas ovttasbargu Gielddalaš- ja ođasmahttindepartemeantta stádačálliin Anne Karin Olliin sámi kulturáššiid dáfus. Mii geahčadat earret eará iešguđetlágan čovdosiid dasa mo ráđđehus sáhttá searvat buriid čovdosiiguin sámi dáidaga ja kultuvrra, ja Tråante 2017 hárrái, dadjá stádačálli Bård Folke Fredriksen.

Deaivvadedje maiddái eará ministtariiguin

Olgešbellodaga sámediggejoavkku jođiheaddji Lars Filip Paulsen dattetge deattuha ahte sin sámediggejoavku ii lean Stuorradikkis Oslos deaivvadan dihte dušše kulturministariin.

– Mii deaivvadeimmet maiddái Biras- ja dálkkádatministariin Vidar Helgesenain ja oahpahusministariin Torbjørn Røe Isakseniin. Mun lean hui ilus go beasaimet dán golbmásiin čoahkkinastit, muitala Paulsen.

– Go leat bellodatustibat ministariiguin, de lea vejolaš earálágan gulahallama háhkat, ja mun vásihin ahte buot ministarat beroštedje gullat min áššiid. Earret eará de soabaimet juohke jahkebealis čoahkkinastit oahpahusministariin ja dainna leat hui duhtavaččat, lohká son.

– Garra nisu

Kulturministtar hirpmástuhtii sámediggeáirasa Ellen Kristina Saba.

– Son ii leat dušše čeahppi, muhto dasa lassin garra nisu, dadjá Saba.