Kárašjoga gieldda dearvvašvuođaguovddáža fuolahusossodagas leat divrrit mat galget leat juo máŋga jagi leamaš doppe. Divrrit leat lanjas gos olbmot galget orrut ja maiddái boradit.
Kárašjoga gieldda dearvvašvuođaguovddáža fuolahusossodagas leat divrrit mat galget leat juo máŋga jagi leamaš doppe. Divrrit leat lanjas gos olbmot galget orrut ja maiddái boradit.
Ávvir lea hupman olbmuin gii lea fitnan ossodagas, ja lea oaidnán divrriid.
– Lea váivi smiehttat ahte leat divrrit gos boares olbmot galget orrut ja maid boradit seamma lanjas gos divrrit leat, lohká olmmoš guhte ii hálit namas almmuhit aviissas.
– Dego gotkkat
Divrrit galget leat juo máŋga jagi oidnon, muhto leat dál laskan.
– Go lihkahallá viessogálvvuid, de ihtet dievva divrrit doppe vuolde. Leat dego gotkkat mat ruhttet juohke sadjái, lohká son ja lea geahččalan gávnnahit mii dat lea divrriid.
– Orru leamen silbanjivdnjat nammasaš divri, ja lea dakkár mii ilbmá go dálus lea lávttasvahát. Dása gal galggašii jođánit gávdnot čoavddus, lohká son.
Váttis jávkadit
Álbmotdearvvašvuođainstituhta vahátealliossodaga direktevra Preben Ottesen lohká gova vuođul orru leamen «skjeggkre», dahje skávžánjivdnjat, muhto jus galggašii sihkkarit identifiseret divrri, de ferte albma ilmmis oaidnit.
( Ášši joatká gova vuolábealde)
– Skávžánjivdnjat lea dakkár mii sáhttá jursit báhpira ja eará, muhto eanaš earduda go sáhttet hui ollu šaddat ja ihtit vaikke gos, ja sáhttá váttis jávkadit, lohká Ottesen.
Stuorát go silbanjivdnjat
2013 rájes lea skávžánjivdnjat (Ctenolepisma longicaudata) dávjá gávdnon Norggas.
– Daid sáhttá doaivut leahkit dábálaš silbanjivdnjagin, muhto skávžánjivdnjagat leat stuoribut ja leat guhkit seaibbit. Silbanjivdnjagis leat seaibbit sullii beali divrri guhko, ja skávžánjivdnjagis ges measta liikká guhkki go divrri gorut. Skávžánjivdnjagis leat maid čoarvvit viŋkilis olggos guvlui, ja nu orru govas maid, lohká Ottesen.
– Doaimmaid bidjat johtui
Kárášjoga gieldda dearvvašvuođaovttadaga jođiheaddji Annfrid Nedrejord ii loga gullan maidege dan birra ahte galget leahkit divrrit fuolahusossodagas.
– Dat lea dieđusge hirpmahuhtti ii ge leat dohkálaš ahte doppe leat divrrit. Mii fertet oažžut teknihkalaš ovttadaga iskat vistti lea go doppe lávttasvahát. Mii fertet maid bidjat doaimmaid johtui, vai divrrit eai sáhte leavvat, lohká Nedrejord.
