-Almmuhus-
-Almmuhus-
OĐĐASATDievdu vuittii measta 9 miljovnna ruvnno

Dievdu vuittii measta 9 miljovnna ruvnno

-

-

Muhtin dievdu Romssa ja Finnmárkku fylkkas vuittii 8 981 650 ruvnno Eurojackpotas ođđabeairuohta.

Badjelaš 30-jahkásaš Sáččá dievdu vuittii bearjadaga 2. vuoittu Eurojackpotas. Son vuittii 8 981 650 ruvnno.

Dievdu lei ruovttus ja lei aiddo boradan ođđabeairuohta mállásiid iežas bearrašiin go Norsk Tipping riŋgii sutnje. Bearaš illudii báhčit rakeahtaid, muhto besse ávvudišgoahtit árabut go telefovdna riŋgii. 

– Duođas? Dat han gal lea áibbas mielaheapme, dajai dievdu go Norsk Tipping riŋgii sutnje ja muitalii ahte lea vuoitán measta 9 miljovnna. 

– Dál lean measta šohkas. Šaddá oba buorre álgu ođđajahkái. Dál gal dorggiidan, lasihii dievdu. 

Jotket ávvudeami

Bearaš jotkkii ávvudeami ja sii ledje maid plánegoahtán ođđa jagi dainna jurdagiin ahte ollu ruđat ledje jođus dievddu kontui. 

– Dá lea juoga man olmmoš lea vuordán jo máŋga jagi, go mun lean speallan jo guhká. Mii joatkit viesu divodemiin boahtte jagi. Odne eahkes mii gal ávvudit ja návddašit, dadjá dievdu gii ii háliit almmuhit nama. 

-Almmuhus-