Okta dievdu huikkii jitnosit ja muosehuhtii stáhtaministara Erna Solberga sártni suoidnemánu 22.b.-muitobottus. Politijjat leat bearráigeahččamin albmá.
Huikkas mielddisbuvttii ahte olbmot jorgaledje albmá guvlui. NTB reportara mielde ledje olbmot čielgasit jierasmuvvan, ja ollugat guovlaledje oalggi badjel. Politiijat válde dievddu johtilit.
– Okta almmái huikkii ja vuorjjai báikkis. Politiijain lea kontrolla dievddu badjel, muhto ii leat vel diehtu dolvojuvvo go arreastai, dieđiha operašuvdnajođiheaddji Oslo politiijaguovllus Marianne Heidenstrøm NTB:i.
– Jurdagiid ferte dáistalit
Solberg (Olgeš) humai ekstrema jurdagiid ja konspirašunteoriijaid birra su sártnis.
– Jurdagat mat movttidahtte terrora dáppe Utøyas, fertejit ain dáistaluvvot. Vašši ii lean čalmmeheapme ja movttidahttikeahtes. Terroristta ekstrema jurdagiin lei ráđđehusgoartil mihttomearrin, dajai Solberg.
– AUF-nuoraid beroštupmi, jurdagat ja oktavuohta lei áitta su máilmmigovvii ja su ideai dasa movt Norga galggai leat, jotkkii son.
Solberg deattuhii ahte polariseren ja behtolaš ođđasat leat oassin mediaduohtavuhtii ja hástala boahttevaš buolvvaid leat historjádihtomielalažžan ja gáldokritihkkalažžan. Son maid muitalii ahte ii oktage galgga gierdat vaši, áitagiid ja hiddjádusaid, ja ahte jietnademiin main lea áigumuš baldit olbmuid javohisvuhtii, áitet demokratiija.
New Zealand ja Sri Lanka
Stáhtaministar čujuhii maid guovttii falleheapmái mat gevve girkuide ja moskeaide New Zealanddas ja Sri Lankas dán jagi. Solberga mielde leat diet issoras muittuhusat ahte máŋggas juogadit terroristtaid ideologiija ja jáhku dasa ahte dat leat “mii ja sii”.
AUF-jođiheaddji Ina Libak maid čujuhii ahte konspirašunteoriijat ja vašši ain gávdno, ja son deattuhii ahte suoidnemánu 22.beaivi ii galgga goassige vajálduvvot.
– Mis oktavuohtan lea ovddasvástádus muitit. Daid luottaid bokte, maidda lea váttis geahččat. Ja lea juste danne mii fertet váldit vára dain. Muitin dihte terrora hirpmus fámu. Muitin dihte ahte terroristtaid jurdagat ja oaivilat šadde min servodagas, dajai Libak.
– Dušše okta almmái lea vásttolaš falleheapmai. Muhto mis lea buohkain ovddasvástádus ahte dat ii goassige geava šat, dajai AUF-jođiheaddji.
Solberga sártni maŋŋel lohke daid 77 oaffara namaid – gávccis dain ledje ráđđehusgoartilis, ja 69 ges goddojedje Utøyas, gos AUF:as lei geasseleaira.
(©NTB)
