Politiijat Norrbottenis dieđihit ahte 40-jahkásaš dievdoolmmoš lea láhppon maŋŋel fanaslihkuhisvuođa Badje Durdnosis, Ruoŧa bealde
Lei sotnabeaivvi go guokte 40-jahkásaš dievdoolbmo leigga vuojašeame fatnasiin Badje Durdnosis. Soai galgaba vuodján geađgái ja nu lea fanas gopmánan. Nubbi almmái beasai gáddái, muhto nuppi eai leat vel gávdnan, nu dieđihit Norrbottena politiijat.
– Čázit leat dulvásat dál ja dat dagaha váttisvuođaid ohcamis. Álggos manai diehtu Suoma heahteveahkkái, muhto go lei dáhpáhuvvan Ruoŧa bealde eanu de šattai min ášši, dadjá Norrbottena guovllupolitiijahoavda Magnus Carlborg.
Ain ohcame
Láhppon almmái galgá ássan Ruoŧa bealde. Norrbottena politiijat leat ohcan albmá helikopteriin, dronaiguin ja beatnagiiguin, muhto disdateahkeda eai lean vel gávdnan albmá.
– Mii joatkit ohcama, muhto eatnu lea váralaš ja dulvvás, nu mii fertet leahkit várrogasat, dieđiha Norrbottena guovllupolitiijahoavda Magnus Carlborg SVT Norrbottenii.
