Nuorta-Finnmárkku dievdu lea dubmehallan golmma jahkái giddagassii.
Finnmárkku politiijat dieđihit preassadieđáhusas ahte Nuorta-Finnmárkku diggegoddi dubmii dievddu golmma jagi giddagassii. Son maid šaddá máksit 120 000 ja 35 000 ruvnno guovtti gillájeaddjái. Oktiibuot ledje guhtta gillájeaddji áššis.
– Dat lea máŋggadáfot ášši man leat dutkan njeallje jagi, eará politiijaguovlluid vehkiin. Das lea sáhka máŋga dáhpáhusas seksuálalaš veahkaválddis neahtas mánáid vuostá. Lea maid seksuálalaš veahkaváldi psyhkalaš doaimmashehttehjuvvon olbmo vuostá. Leat duđavaččat go diggegoddi lea bidjan deattu daid duođaštusaide maid buvttiimet ovdan váldošiehtadallamis, dadjá áktor John Kåre Olsen.
Interneahtta noađđin
Finnmárkku politiijat oaivvildit ahte seksuálalaš veahkaváldi mánáid, nuoraid ja olbmuid vuostá geat leat hearkkes dilis, lea earenoamáš duođalaš. Neahttaveahkaváldi lea earenoamáš noađđin gillájeddjiide go juhket govaid interneahtas ja sáhttet ihtit máŋga jagi maŋŋel go lea geavvan.
– Dakkár áššiin oaidnit dávjá ahte máŋga gillájeaddji leat vásihan dákkár vearredagu seamma olbmos. Danne lea dehálaš almmustahttit ja bissehit dakkár láhttenvuogi, čilge Olsen.
