Politiijat bidje guokte dievddu ambulánsabargiid háldui váldin dihte varraiskosiid, maŋŋel go leigga balahuvvon gárrenoaivvis vuoddján biillain. Nubbi dievdu ii doahttalan doaktáriid ii ge ambulánsabargiid, ja guđii dearvvašvuođaguovddaža Guovdageainnus nu eai beassan váldit varraiskosiid.
Politiijat bidje guokte dievddu ambulánsabargiid háldui váldin dihte varraiskosiid, maŋŋel go leigga balahuvvon gárrenoaivvis vuoddján biillain. Nubbi dievdu ii doahttalan doaktáriid ii ge ambulánsabargiid, ja guđii dearvvašvuođaguovddaža Guovdageainnus nu eai beassan váldit varraiskosiid.
Lávvordat čuovganeapmái, diibmu 03.57, ožžo politiijat dieđu ahte okta biila lea vuoddján badjelluotta, sullii 2,5 miilla Guovdageainnu lulábealde.
Olbmot, guđet galge leat biillas, eai lean šat biilla luhtte, muhto politiijat gávdne veahá maŋŋelaš daid olbmuid.
Gávdne guoktása
Oarje-Finnmárkku operašuvdnajođiheaddji, Eirin Hansen Abuukar, muitala politiijat vulge báikái dakkaviđe oktan ambulánssain, ja gávdne guokte dievddu luotta alde.
Goappešat dievddut leaba goalmmatlotjahkásaččat.
Báhtarii
Go politiijat hupme báikkis dievddu guoktáin, de ohcaledje vel goalmmát olbmá, guhte galgá maid biillas leamaš.
Dan botta go politiijat báhce ohcat dan goalmmát olbmá, de dolvojuvvuiga dat guokte dievddu Guovdageainnu dearvvašvuođaguovddážii, varraiskosiid váldinvárás.
Politiijat balahedje sudno gárrenoaivvis vuoddján.
Go varráiskosat galge váldot, de vulggii dat nubbi dievdu dearvvašvuođa guovddážis eret, nu eai ožžon sus varraiskosa.
Ambulánsabargiid hálddus
Hansen Abuukar, ii sáhte daddját juste movt dievddu guoktá leat dolvon Guovdageidnui, muhto jáhkká leaba Ambulánsa mielde sáddejuvvon.
– Politiijat vuoruhedje ohcat dan goalmmát olbmá, ja báhce ohcat su dan botta go dan guokte dievddu dolvo dearvvašvuođaguovddažii varraiskosiid váldit.
– In dieđe sihkkarit, muhto ferteba ambulánsa mielde mannan, go politiijat vuoruhedje dan goalmmáda ohcat, go lei čoaskkis ja ballu lei ahte sáhttá roasmmohuvvan, muitala Hansen Abuukar.
Galge dieđu oažžut
Go dievddu guoktá dolvo dearvvašvuođaguovddážii, de lei šiehtadus nu ahte politiijat galge oažžut dieđu go leat geargan varraiskosiid váldimis, ja galge de boahtit dearvvašvuođaguovddážii.
Ovdal go besse varraiskosiid váldit, de jávkkihii dat nubbi dievdu.
– Ii leat riekta lohkat son báhtarii politiijain gal, go son ii lean politiijaid hálddus. Son dušše guđii báikki ovdal go varraiskosat ledje váldon, muitala Hansen Abuukar
Ásahuvvo ášši
Hansen Abuukar muitala ahte sii dihtet goappašagaid geat leaba, ja sii leat ohcame dan dievddu geas eai leat vel ožžon varraiskosiid.
– Mii leat ohcame su, muhto eat dieđe gos son lea. Lihkká ásahuvvo ášši maid su vuostá, go mii diehtit iskosiid vuođul gii lea biilavuoddji leamaš, muitala son vel loahpas.
Lea go dábálaš ahte ambulánsabargiid háldui bidjat olbmuid geaid balahehpet gárrenoaivvis vuoddján biillain, ja sii galget doalvut daid dearvvašvuođaguovddažii varraiskosiid váldit?
– Ferte muitit ahte politiijat vuoruhedje ohcat dan goalmmát olbmo, mii galggai leamaš maid biillas, go sáhti leat roasmmohuvvan ja lei čoaskkis. Ii leat gal dábálaš, muhto dán háve vuoruheimmet dan dahkat, lohká Oarje-Finnmárkku operašuvdnajođiheaddji, Eirin Hansen Abuukar, Ávvirii.
Politiijat eai gávdnan dan goalmmát olbmo guhte dieđuid mielde sáhti leamašan biillas.
