-Almmuhus-
-Almmuhus-
OĐĐASATDievdu áššehuvai doarrunáššis

Dievdu áššehuvai doarrunáššis

-

-

Veahkaválddálašvuođaášši mas dievdu lei áššáskuhtton doaruhan nuppi, vuorrasit albmá, lea meannuduvvon Sis-Finnmárkku diggegottis. 

Golggotmánus diibmá, iđitdiimmuid, galgá doarrun dáhpáhuvvan muhtin viesus Sis-Finnmárkkus.

 

Čuoččuhii iežas vigiheapmin

Áššáskuhtton dievdu galgá huškon ja čiekčan nuppi dievddu nu ahte sus doddjui njunni ja okta bátni beasai. 

Cuoŋománu 25. beaivvi deaivvadeigga albmát Sis-Finnmárkku diggegottis, ja áššáiskuhtton almmái čuoččuhii iežas vigiheapmin, ja dajai iežas heađis časkán nuppi albmá. 

Áktor lei gáibidan 90 beaivvi giddagasa albmái dasa lassin go galgá máksit buhtadusa nuppi albmái. 

Áššáskuhtton albmá bealušteaddji gáibidii albmá áššehuvvat go lea suodjalan iežas.

 

– Gillájeaddji lei suhttan

Áššáskuhtton dievdu čilgii ahte gillájeaddji lei suhttan ja dearppai beavddi.

Son čilgii viidáseappot ahte go soai leigga gáržžes feaskáris, de gillájeaddji časkkii áššáskuhtton albmá, ja dán maŋŋel lea áššáskuhtton almmái heađis várjalan iežas.

Dát čilgehus lei jáhkehahtti eanetlohkui, ja eanetlohku oaivvildii ahte áššáskuhtton dievdu galgá áššehuvvat. 

Dikki unnitlohku fas oaivvildii ahte áššis lea eahpitkeahttá duođaštuvvon ahte gillájeaddji almmái lea vásihan veahkaválddálašvuođa, ja ahte áššáskuhtton dievdu galgá dubmehallat.

 

-Almmuhus-