Finnmárkku politiijat leat áššáiduhtton muhtin Nuorta-Finnmárkku dievddu, gii lea guđátlotjahkásaš, go balahit su dahkan olmmošgávppašeami ja veagalváldima.
Finnmárkku politiijat leat áššáiduhtton muhtin Nuorta-Finnmárkku dievddu, gii lea guđátlotjahkásaš, go balahit su dahkan olmmošgávppašeami ja veagalváldima.
Dán dieđiha Finnmárkku politiijaguovlu preassadieđáhusas bearjadaga.
– Politiijat oaivvildit dievddu bovden gillájeaddji boahtit Norgii dan jáhkus ahte galgaba leat ovttas, muhto go nisu bođii Norgii borgemánus, biddjui son bargat borranbáikkis mas dievdu lei mielde jođiheame. Nisu šattai bargat guhkes beivviid bálkká haga ja bargošiehtadusa haga. Son bággehalai maid seksuálalaš ovttastallamiidda dievdduin, dieđiha politiijaadvokáhtta John-Kåre Olsen.
Gáibidit viiddidit giddagasáiggi
Politiijat bivdet dievddu njealji vahkkui háldogiddagassii, mas reivvestallan ja guossástallan gildojuvvo.
Nuorta-Finnmárkku diggegoddi lea válljen doallat dievddu giddagasas ovtta vahkku.
Finnmárkku politiijaguovlu lea váidán diggegotti mearrádusa Hålogalándda lágamánneriektái, ja gáibidit viiddidit giddagasáiggi.
Dutket ain ášši viidáset
– Politiijat dutket ášši viidáset. Lea duođalaš áššáiduhttin ja dutkan lea dušše álgodásis. Ollu vihtanat leat dutkojuvvon ja politiijat leat gávdnan biologalaš ja elektrovnnalaš duođaštusaid. Lea ain ollu sihke teknihkalaš ja taktihkalaš dutkan maid fertejit bargat, ja politiijat eai dieđe sáhttá go áššáiduhttin vel rievdat.
Advokáhtta Jens Bernhard Herstad lea dievddu bealušteaddji. Gillájeaddji advokáhtta lea Edel Hennie Olsen.
Áššáiduhtton dievdu ii leat mieđihan iežas sivalažžan, čállá Finnmárkku politiijaguovlu preassadieđáhusas bearjadaga.
