-Almmuhus-
-Almmuhus-
OĐĐASAT Almmái lea gávdnon jápmán

Almmái lea gávdnon jápmán

-

-

Fanaslihkohisvuohta Anárjogas:

Mannan ija dieđihedje politiijat ahte sii ožžo dieđu johkafatnasa birra mii lei gopmánan Anárjogas – ja okta olmmoš lei láhppon. 

– Mii leat bidjan johtui gádjunakšuvnna maŋŋel go oaččuimet dieđu gopmánan johkafatnasa birra. Okta olmmoš lei oidnon fatnasis. Sea King lea lokaliseren fatnasa. Biddjo johtui ohcan jogas ja johkagáttis, lei politiijaid diehtu Twitteris diibmu beal golmmas mannan ija.

Beal oktanuppelogis bidje politiijat ođđa dieđu Twitterii, gos bođii ovdán ahte olmmoš lea duššan.

– Láhppon olmmoš gávdnui duššan johkii, sullii 20 mehtera eret báikkis gos lahppui. Gávdnui suomabealde, čállet Finnmárkku politiijat Twitteris.

Guovttis fatnasis

Olmmoš gii lei láhppon, lei badjelaš 60 jagi ja lei guovllus eret. Finnmárkku politiijaguovllu operašuvdnahoavda, Tarjei Leinan Mathiesen, muitala ahte fatnasii dievvagođii čáhci ja dan dihte gopmánii. Fatnasis ledje guokte olbmo go gopmánii – ja dušše nubbi beasai gáddái.

– Nubbi beasai gáddái, muhto nubbi dađibahábut manai rávnnji mielde johkaráigge vulos. Son gii beasai gáddái, dieđihii politiijaide jođánit dáhpáhusas, ja mii oaččuimet dieđu diibmu 02:23, lohká Mathiesen. 

Eaktodáhtolaččat veahkkin

Sea King gávnnai fatnasa, muhto ohcanveahka ii lean vel gávdnan albmá diibmu ovccis go Ávvir hupmá Finnmárkku politiijaguovllu operašunhoavddain. Sihke politiijat, Rukses Ruossa, Siviilasuodjalus, buollindoaimmahat ja Suoma ohcanveahka ohce albmá. Mathiesen muitala olu eaktodáhtolaččaid, maiddái Kárášjoht olbmuid, veahkkin leamaš ohcame láhppon olbmo.

– Lei hirbmat buorre go eaktodáhtolaččat ledje veahkkin, ja sáhtte johkafatnasiiguin ohcat sihke jogas ja johkagáttis, lohká son. 

Dáhpáhus galgá leat geavvan Bartageavŋŋis, lahka ráji gaskkal Norgga ja Suoma. 

LAHKA SUOMARÁJÁ: Fanas galgá leat gopmánan Bartageavŋŋis. Govva: Šearbmagovva Google Kart.
LAHKA SUOMARÁJÁ: Fanas galgá leat gopmánan Bartageavŋŋis. Govva: Šearbmagovva Google Kart.
- Advertisement -
-Almmuhus-