-Almmuhus-
-Almmuhus-
OĐĐASAT Dievddut viggan dájuhit nieiddažiid biilii

Dievddut viggan dájuhit nieiddažiid biilii

-

-

Politiijat bivdet olbmuin cavgilemiid maŋŋel go guokte dievddu galgaba geahččalan dájuhit mánáid biilii.

Ájluovttas, Divttasvuona suohkanis galgaba guokte dievddu geahččalan fillet mánáid biilii dán vahkkus.

Soai galgaba leat fállan njálgáid mánáide.

 – Ikte riŋgii muhtin eadneolmmoš muitalit ahte dievddu guovttos geahččaleigga fillet su 8-jahkásaš nieiddaža ja su 6-jahkásaš nieidaskihpára biilii. Moadde diimmu maŋŋel riŋgii eará eadni politiijaide ja muitalii sullasaš dáhpáhusa birra, muitala Hábmira leansmánni Aslak Finvik.

 

Čáhppes biila

Dál háliidit politiijat gávnnahit geat dievddu guovttos leaba, ja dáhtot olbmuid cavgilit jus dihtet eanet ášši birra.

 – Mánát leat muitalan ahte guokte vilgesvárat dievdoolbmo geahččalit sin fillet biilii. Dievddu guovttos vuodjiba čáhppes biillain, lea sáhka muhtin stašuvdnavovnnas, lohká Finvik.

 

Mánáin galgá oadjebas dilli

Politiijat sáhttet cavgilemiid ja vákšumiid vuođul gávnnahit geat mánáid geahččalit dájuhit.

Hábmira leansmánnis, geas maiddái lea ovddasvástádus gozohit Divttasvuona oarjjabeali dadjá iežaset váldit áššiid duođalaččat.

 – Mánáid oadjebasvuohta lea deháleamos ášši politiijade. Danin lea hui dehálaš ahte olbmot cavgilit jus dihtet maidege, mánát han leat min buot ráhkkásepmosat. Ovttas olbmuiguin sáhttit bargat oadjebas servodaga ovddas, lohká leansmánni Aslak Finvik.

 

Ávžžuha hállat mánáiguin

Politiijat ávžžuhit olbmuid Ájluovttas ja eará báikkiin birrasis atnit čalmmiid rahpasin, ja váhnemat ges berrejit hállat mánáiguin.

 – Mus lea gal ipmárdus ahte váhnemat čehpet hállet mánáiguin, muhto muittuhan dattege ahte lea hui dehálaš muitalit mánáide ahte eai galgga amas olbmuiguin hállat ja sin fárrui vuolgit, ávžžuha leansmánni.

 

Dáhpáhuvvá duollet dálle

Son lea bargan politiijan masá 35 jagi, ja muitala sin guovllus duollet dállet dutkan sullasaš áššiid.

 – Muhtumin vásihat sullasaš áššiid, ja mu áigodagas politiijas leat nagodan cavgilemiid vuođul máŋgii kártet geat dat vigget dájuhit mánáid, loahpaha Hábmira leansmánni Aslak Finvik.

Ávvir lea geahččalan olahit muhtin eadneolbmo ságaide, muhto ii leat dainna lihkostuvvan.

 

-Almmuhus-