Dearvvašvuođa- ja sosiálasuorggis barget eanemus nissonolbmot, muhto dál lassánit dievdoolbmot dan suorggis.
2017 rájes 2018 rádjái lassánedje dievddut 2,9 proseanttain dearvvašvuođa- ja sosiálasuorggis, nissonat fas lassánedje 1,9 proseanttain seamma áigodagas.
Earenoamáš olu dievddut leat válljen bargagoahtit mánáid- ja nuoraidbargin dahje dearvvašvuođafágabargin, dieđiha Statistihkalaš guovddášdoaimmahat.
Unnán dievddut válljejit oahpu dearvvašvuođačállin, bátnedearvvašvuođačállin, jorttamovran ja dearvvašvuođadivššárin, dušše 1 proseantta dan suorggi bargiin leat dievddut.
Guovtti suorggis eanet dievddut
Nissonat leat ain eanetlogus eanaš dearvvašvuođasuorggi bargguin, muhto ambulánsasuorggis ja kiropráktoriid searvvis leat eanemus dievddut.
67 proseantta ambulánsabargiin ja 62 proseantta kiropráktoriin leat almmáiolbmot.
