Dievddut juhket mearkkašahtti eanet go nissonolbmot iešguđet dilálašvuođain. Av-og-til organisašuvdna váruha ahte dát sáhttá dagahit dikkiid luomustallamis.
Geassi lea áigodat go alkoholageavaheapmi lassána Norggas. Ođđa guorahallamis maid Ipsos lea čađahan boahtá ovdan ahte dievddut juhket eanet go nissonolbmot iešguđet dilálašvuođain.
Stuora erohusat
30% dievdduin geat serve jearahallamii, vástidedje ahte sii juhke 6 dahje eanet alkoholaovttadaga maŋemuš go ledje olgobáikkiis, ja nissonolbmuin fas dušše 14%. 11% dievdduin vástidii dan seamma go jerrojuvvui maŋemus go árgabeaivvis ledje juhkan alkohola, ja dás vástidedje dušše 2% nissonolbmuin dan seamma.
– Dás lea sáhka stuora meriid alkohola. Galgá oba ollu nu ahte it rievdat láhttema go leat juhkan guhtta alkoholaovttadaga, ja jus leat bearrašiin luomus de sii goit fuomášit rievdamiid jođánit. Maiddái mánát, dadjá Randi Hagen Eriksrud gii lea generálačálli Av-og-til organisašuvnnas.
Čuohcá mánáide
Luomu áiggi ellet mánát ja váhnemat measta juo dadjat badjálaga. Dát dagaha maid ahte mánát álkit fuomášit jus váhnemat diggojit dahje juhket alkohola beare ollu.
– Barttain ja viessovovnnain lea unnit sadji, ja mánáin ii leat vejolašvuohta geassádit iežaset latnjii dahje olbmáid lusa. Sii besset maid dávjá guhkit gohcit ja ožžot olu eanet mielde mii dáhpáhuvvá. Danin lea dehálaš ahte váhnemat jurddašit iežaset alkoholageavaheami birra ovddalgihtii ja vuhtiiváldet mánáid, ávžžuha Eriksrud.
