Beaivváš Sámi Našunálateáhtera hoavda Rolf Degerlund bovde buot dievdduid boahtit geahččat čájálmasa nuvttá.
Beaivváš Sámi Našunálateáhtera hoavda Rolf Degerlund bovde buot dievdduid boahtit geahččat čájálmasa nuvttá.
– Buot dievddut geat bohtet geahččat Gába čájálmasa dal dán smávva mátkkis Deanus, Sirpmás, Kárášjogas, Guovdageainnus, Leavnnjas ja Anáris, besset geahččat Gába čájálmasa nuvttá, eai dárbbat máksit bileahta ovddas.
Teáhterhoavda ávžžuha ge de seammás sin geat dávjjimusat leat geahččame teáhtera, nissonolbmuid, bovdet mielde dievdduid geahččat Gába čájálmasa.
(Ášši joatká gova vuolabealde)
Gábas čuovvut mii Rávnna ja Gájjá, geat leaba vázzán goabbatlágan bálgáid eallimis. Gájjá, gii lea neaktinniegu čuvvon, ja Rávdná, gii lea ruovttu ja bearraša gohkken. Vaikko leaba ge guovtteláganat, de leaba aŋkke muhtun ládje ovttaláganat. Goappašagain leat, nu go juo buot nissonolbmuin, čiegusvuođat nu go guhkidit čalbmeguolggaid, oažžut eret eará guolggaid dahje siliikona. Ja dieđusge maiddái čiegus niehku gávdnat albma dievdoolbmo, gos áiggi mielde fuomáša ahte ferte vuolidit gáibádusaid ja viiddidit ohcanguovllu.
– Čájálmas čájeha nissonolbmuid čiegusvuođaid, nu go háliidit gávdnat dievdoolbmo, ja árgabeaivválaš váttisvuođat maid eai dávjá jitnosit huma, muitala váldočálli Harriet Nordlund.
Lea Roger Ludvigsen gii lea čállán musihka, ja Asta Balto ja Rawdna Carita Eira geat leaba jorgalan bihtá ja lávlagiid.
Dás vuolábealde oainnát goas ja gos dievddut besset nuvttá geahččat Gába čájálmasa.
19.4. Deanus, Birasvistis
20.4. Sirpmás, skuvlla valáštallansálas
21.4. Kárášjogas, Dáiddaguovddážis.
27.4. Guovdageainnus, Kulturviesus
28.4. Leavnnjas, Antikstores
29.4. Anáris, Sajosis
