Sámedikki dievasčoahkkima jođihangoddi lea galledan Stuorradikki dán vahkkus.
– Lea buorre ahte mii ovttas presideantagottiin sáhttit lonohallat vásáhusaid, ja beassat oaidnit movt Stuorradiggi meannuda áššiid ja organisere debáhtaid. Bargovásáhuslonohallan ovdánahttá min, ja mii oažžut eanet máhtu das movt Stuorradikkis barget, lohká Sámedikki dievasčoahkkinjođiheaddji Tom Sottinen.
Parlameantta dásis
Iežaset Facebook siiddus čállá Sámediggi ahte Sámedikki dievasčoahkkima jođihangoddi ráhkada áššelisttu, gohčču čoahkkimiidda ja jođiha Sámedikki dievasčoahkkimiid Sámedikki bargoortnegis mearriduvvon njuolggadusaid mielde.
– Mii dáhttut čađat nannet gelbbolašvuođa ja sihkkarastit ahte meannudat áššiid sihkkaris ja buriid vugiid mielde, mii lea parlameantta dásis, lohká Sottinen