-Almmuhus-
-Almmuhus-
SMÁVVAOĐĐASATDiesel ja bensiidna divron measta beliin

Diesel ja bensiidna divron measta beliin

-

-

Sihke diesel- ja bensiidnahaddi lea garrasit divron jagis. Dát lea NAF mielas balddihahtti.

Dieselhaddi lea divron 49 proseanttain jagis. Bensiidna lea ges divron 43 proseanttain.  Dan čájehit Statihkalaš Guovddášdoaimmahaga ođđa logut. Logut fuolastuhttet Norges Automobil-Forbund (NAF).

– Dál ferte ráđđehus oaidnit duođalašvuođa ja unnidit divadiid, lohká Thor Egil Braadland, geas lea NAF:s ovddasvástádus eiseválddiiguin gulahallat preassadieđáhusain. 

NAF dieđuid mielde ain lassánit bensiidna – ja dieselhattit. Gaskamearálaš haddi bensiidnalihttaris lei miessemánus 22,96 ruvnnu ja dieselhaddi fas 22,39 ruvnnu.

– Dát lea balddihahtti lassáneapmi, ja olu dállodoalut rahčet dáid olahushattiid geažil. Mii leat dálvvi ja giđa ohcalan doaimmaid, muhto vástádussan lea leamašan jávohisvuohta. Ráđđehus lea lohpidan unnidit divadiid mat čuhcet dábálaš olbmuide, muhto eai čuovvol iežaset lohpádusaid ná duođalaš dilis, lohká Braadland. 

– Čuohcá garrasepmosit boaittobealeguovlluide

NAF čállá ahte dušše mánus lea boaldámušhattit lassánan gaskal 6,67-8,10 proseanttain. NAF oaivvilda dán čuohcat garrasepmosit olbmuide geat orrot boaittobealeguovlluin gos leat unnán vuos el-biillat ja gos olbmot juohke beaivvi dárbbašit biilla. 

NAF lea ge evttohan vugiid mo unnidit ekonomalaš váikkuhusaid biilavuddjiide ja mo eanebut sáhttet oastit el-biilla. 

– Unnidit divadiid lea deháleamos doaibma ja ráđđehusas lea vejolaš vuolidit bumpehattiid garrasit jus fal lea beroštupmi, oaivvilda Braadland.

-Almmuhus-