Nuorra boazodoallái lei buorren sáhkan go gulai ahte Murmánskka bušeahtta bokte juolludit su boazodoallofitnodahkii doarjaga. 36 ealáhusfitnodagas 16 ožžo doarjagiid.
– Lea eaktu ahte galgá leat fitnodat ovdal go sáhttá ohcat doarjaga. Dá lea juohke sajis. Stáhta ii sáhttá beare dábálaš olbmui addit ruđaid, čilge Maksim Vasiljev (30) gean fitnodat fidnii doarjaga.
Jahkásaččat 2006 jagi rqjes sierra lávdegoddi Murmánskka guovloráđđehusas meannudit ohcamiid mat gusket fitnodagaid main leat árbevirolaš sámi doaimmat guovddážis. Ruošša lága mielde dakkár fitnodagain lea namma “obshina”. Vasiljev obshina namma davvisámegillii lea “Sámi nuoraidbuolva”. Dán jahkái juolludit 16 fitnodatdolliide doarjagiid 2,5 millijovnna rubela ovddas mii lea sullii 300 duháha norgga ruvnno.
– Eallit dainna mainna áddjá elii
Maksim Vasiljev lohká iežas mánnávuođa rájes boazodoalus. 2006 jagis álggahii fitnodaga vuoi beassat bohccuiguin bargat nu mo su áddjá. Ádjás ge árbii bohccomearkka.
– Dieđus dáinna doarjagiin šaddá álkit juoidá oastit. Muhto galgá vel ollu ieš bargat jus háliida juoidá ollet. Ii galgga beare vuordit skeaŋkka. Mii álggiimet 2006 jagis bargat dan nala ahte beasat áiggi mielde bargat bohccuiguin nu mo áddjá.
Eatnamiid oažžut
Vasiljev sániid mielde oanehis áiggis ii olle visot. Danin proseassa váldá ollu áiggi.
– Dassážii mus atnen ollu áiggi oažžut bargovásáhusaid boazodoalus. Ollu leamašan Norgga bealde geahččame movt doppe barget bohccuiguin. Muđui bargen vuoi oastit skohteriid, eará rusttegiid go dát dárbbašuvvojit boazodoalus. Dál ges galgat čielgadit goas ja gos Lujávrri suohkanis oažžut eatnamiid.
Juste dál Máksim Vasiljev lohká su bohccot guođđuhuvvuojit “Tundra” nammasaš kooperatiivas Lujávrri suohkanis.
Go Ávvir humadii suinna de Vasiljev lei Guovdageainnus, Sámi allaskuvllas gos lea mielde ođđa oahppoprográmmas man namma lea “Biologalaš máŋggabealatvuohta davviguovlluin álgoálbmot perspektiivvas”. Boahtte vahku fas lea Lujávrái.
– Vuolggán meahccái, duoddarii, bohccuid lusa go lean fas ruovttus. Somá ge dán oahpu čuovvut. Ođđa vásáhusat, ođđa olbmot, eará álgoálbmotkultuvraiguin oahpásmuvvat.
