-Almmuhus-
-Almmuhus-
OĐĐASATDieđiheapmi man birra politihkkarat eai dieđe maidege

Dieđiheapmi man birra politihkkarat eai dieđe maidege

-

-

Guovdageainnu suohkanstivrras boahtá ovdan ahte politihkkariin ii leat makkárge diehtu dan birra, ja Valio čilgii nu bures go sáhtii.

Báhkka ášši Guovdageainnu suohkanstivrras lei go suohkandirektevra, Kent Valio, lea ovddidan dieđihanášši go politihkkárat galget fámostallan ja go galget bággen alcceseaset eanet buriid go maidda lea riekti.

Vuosttaš ášši, mii lei suohkana jahkerehketdoalu birra, dainna gearggihedje viđa minuhtas. Go ášši bođii suohkana jahkedieđáhusa birra, de šattai olu digaštallan ja olu jearaldagat bohte ovdan sárdnestuolus.

Loga maid:
Gáibida guora­hallama ja ehtalaš njuolgga­dusaid: – Poli­tihkkárat eai galgga geavahit fámu alcces ja lagas­olbmuide buorrin

Dieđihan

Olu dain gažaldagain ledje dan birra go suohkandirektevra lea ovddidan dieđiheami politihkalaš dási ektui, ja maid go leat ovddiduvvon jahkedieđáhusa bokte ehtalaš njuolggadusat maid birra ii ge oro oktage diehtime goas leat ovddiduvvon ja guđe hámis.

Sátnejođiheaddji Hans Isak Olsen ii loga diehtit maidege dan dieđiheami birra, ii ge loga ehtalaš njuolggadusaid dáfus ge ožžon ášši.

Son šattai máŋgii deattuhit ahte ii dieđe maidege ášši birra, ja loahpas ii šat mannan sárdnestullui ge geardduhit iežas.

Ávvir bivddii Guovdageainnu suohkandirektevrra, Kent Valio, čilget ášši.

– Mun lean ovddidan dieđihanášši suohkana dieđihanjovkui guovvamánu 24. beaivvi dán jagi. Dan sivas go suohkana dieđihanjoavkku áirasat leat suohkana bargit, ja mun de lean sin hoavda, de dan vuođul leat sii bealálaččat áššis eai ge dan geažil leat gieđahallan ášši. Suohkanstivra veadjá maid leat bealálaš dan áššis go dieđiheapmi lea politihkkariid ektui. Dan olis leat dieđihanjoavku ráđđádallan departemeantaráđiin das movt galgá dahkat áššiin, ahte galgá go olggobealde suohkana ášši gieđahallat, muitala son.

MUITALII MAID SÁHTII: Guovdageainnu suohkandirektevra, Kent Valio, buvttii dieđuid dieđihanášši birra maid lea sádden suohkana dieđihanjovkui. Govven: Anne Berit Anti
MUITALII MAID SÁHTII: Guovdageainnu suohkandirektevra, Kent Valio, buvttii dieđuid dieđihanášši birra maid lea sádden suohkana dieđihanjovkui. Govven: Anne Berit Anti

Ovdamearkkat

Valio maid čilge ahte áššái gullá maid dat ahte son lean ovdanbuktán buot áššiid, maid ektui lea válljen dieđiheami ovddidit ovdagoddái guovvamánu 22. beaivvi dán jagi.

– Leat duohta ahte eai leat oaidnán guđemuš áššiid dáfus lean válljen dieđihit. Mun lean dušše muhtun áššiid válljen dieđihit ovttasráđiid guvttiin áššečehpiin, ja de leat  válljen dan ektui makkár duođaštusat leat ja guđiid paragráfaid vuođul galgá dieđihit, ja de leat válljen vel muhtun ovdamearkkaid, muitala Valio.

Loga maid:
GLR redaktevra lohká ehtalaš njuolggadusaide leat dárbbu: – Muittán bures go bellodatustibat rievdadedje fitnodateaiggáda loana doarjjan

Valio ii lohkan makkár ovdamearkkat leat maid leat atnán dieđiheamis. Go ášši rahppui, de lea suohkandirektevra gii ovddida jahkedieđáhusa. Son ovddidii dan ja doppe ovdanbuvttii ge son maid sihke dieđiheami birra ja ehtalaš njuolggadusaid.

Valio dajai sárdnestuolus dieđiheami birra ahte lea dieđiheamis sáhka politihkalaš dási ektui. Son dajai earret eará ahte dieđiheapmi lea dan birra go muhtun politihkkarat bággestallet eanet buriid alcceseaset go maidda sis lea riekti. Áitagat dan ektui leat de fas ahte son galgá eret virggistis, ahte leat duostileabbon šaddan ja oasit sáhttet duođaštuvvot. Dasa lassin son dajai vel ahte dego hutket baháid maid ovddas son (red. meark. Kent Valio) sáhttá šaddat sivalažžan. 

Valio maid dajai sárdnestuolus ahte ii leat sáhka ráŋggáštit ovttage, muhto heaittihit dakkár daguid, ja su ulbmil dieđihemiin lea ahte dahkat juoidá dainna vieruin.

II DIEĐE MAIDEGE: Guovdageainnu sátnejođiheaddji, Hans Isak Olsen, ii loga diehtit maidege Kent Valio dieđiheami birra.
II DIEĐE MAIDEGE: Guovdageainnu sátnejođiheaddji, Hans Isak Olsen, ii loga diehtit maidege Kent Valio dieđiheami birra.

Ovdanbuktán 

Sárdnestuolus maid dieđihii sátnejođiheaddji Olsen ahte ehtalaš njuolggadusaid dáfus son ii maid dieđe maidege, go dat eai leat ovddiduvvon áššin politihkkariidda.

Ávvir bivddii Valio dan maid čilget.

– Ehtalaš njuolggadusat leat ovdanbukton seamma čoahkkimis ovdagoddái guovvamánu 22. beaivvi, ja maid ovdal sáddejuvvon politihkalaš jođiheapmái, lohká son

Vaikke giddet čoahkkima

Máŋggas suohkanstivrras muitaledje ahte sii leat ožžon olu gažaldagaid dan ášši birra, ja measta juo čuoččuhuvvon gielisin, go eai dieđe maidege.

Sis lei maid dárbu dieđuid oažžut Valio dieđiheami birra, ja máŋggas ledje ovttaoaivilis ahte vaikke giddet suohkanstivrra vai galgá vejolaš dieđuid oažžut.

Suohkanstivrras liikká eai meannudan dieđihanášši eai ge ehtalaš njuolggadusaid ášši. Sátnejođiheaddji ii loga ožžon goappáge ášši meannudeapmái, ja lohpidii nu johtilit go vejolaš čálalaččat bivdit daid áššiid vai beassá ráhkkanahttit áššiid vai lea vejolaš gieđahallat daid.

-Almmuhus-