NBR mielas lea ođđa stuoradiggedieđáhus boazodoalu birra heajos ođas boazodoalloealáhussii.
Norgga boazosápmelaččaid Riikkasearvvi (NBR) jođiheaddji Ellinor Marita Jåma mielas ođđa stuoradiggedieđáhus boazodoalu birra beahttá olles boazodoalloealáhusa.
– Dieđáhusas lea jorggu ládje jurddašuvvon movt sámi árbevirolaš boazodoallu čađahuvvo, go das lea ollu fokus ahte galgá bearráigeahčču, lohká son.
– Eat váldon bealljái
Jåma mielas lea heittot go dát stuoradiggedieđáhus galgá leat dego mállen boazodoallopolitihkkiii ollu jagiid ovddasguvlui.
– Mis leat NBR bealis leamaš ráđđádallamat ráđđehusain dán dieđáhusa barggu oktavuođas, ja mii leat dáhtton ahte boazodoalloláhka galggašii reviderejuvvot. Das eat gal leat váldon bealljái, ja lea veahá paradoksa go mii dáhttut rievdadusaid boazodoalloláhkii, de eai beroš gullat, ja ieža gal rievdadit juste movt háliidit, lohká Jåma.
Loga maid: Áigot almmuhit buohkaid boazologuid
Dahkkon unnán máhtuin
Jåma muitala sii leat maid deattuhan ráđđádallamiin ahte dieđáhussii berre leahkit nanu máhttovuođđu.
– Dán dieđáhusas čuovgá čađa ahte lea ráhkaduvvon váilevaš máhtuin, ja mii leimmet ge gáibidan ahte dahkko NAČ (Norgga almmolaš čielggadeapmi) raporta, muhto dat ii dahkkon, lohká Jåma.
Loga maid: Ná áigot stivret boazodoalu boahtteáiggis
– Ii ollu buorre dadjat dieđáhusa birra
Áidna maid Jåma sáhttá lohkat lea positiiva dieđáhusas lea go das namuhit doaimmaid mat ovddidit ceavzilis boazodoalu.
– Maiddái dat lea positiiva go ráđđehus lea oaidnán dárbbu hábmet ođđa stuoradiggedieđáhusa boazodoalu birra, ja lea bivdán min fárrui, go lea hui guhkes áigi go ovddit dieđáhus bođii. Muhto ii leat nu ollu buorre dadjat dan dieđáhusa birra.
– Leage hui guhkes áigi go lea boahtán stuoradiggedieđáhus boazodoalu birra, ja dál livččii leamaš vejolaš ovdanbuktit buori dieđáhusa mas leat buorit doaimmat. Dan sadjái oažžut mii dán dieđáhusa, mii lea njulgestaga heittot boazodollui, lohká Jåma.
Stuorradiggi galgá loahpalaččat meannudit stuorradiggedieđáhusa, dál dattetge ii leat vuos mearriduvvon goas dán meannudit.
