Sámi elektropønk joavku Biru Baby čuojaha Riddu Riđus Boahtte geasi. Sii galget maid giktalit gehččiid sin earenoamáš láhttemiin lávddis go Riddu Riđđu almmuha festiválaprográmma Romssas.
Sámi elektropønk joavku Biru Baby čuojaha Riddu Riđus Boahtte geasi. Sii galget maid giktalit gehččiid sin earenoamáš láhttemiin lávddis go Riddu Riđđu almmuha festiválaprográmma Romssas.
Biru Baby lea siivvožit čoaggán čuvodeddjiid ja ožžon nama leat okta Norgga buoremus joavkkuin.
Sii seaguhit musihkkašáŋŋeriid, ja sáhttet oažžut musihka stuorisin ja čuohccin, mii lea boktán beroštumi Norgga musihkkamáilmmis.
– Olles Biru-veahka illuda searvat Riddu Riđu lávvufestii, muitala joavkku lávlu, Hánná, ja lohká ahte sii leat aiddo almmuhan ođđa skearru, «Ancient Call», ja dál lea Riddu Riđđu addán vejolašvuođa čájehit sin musihka Romssas miessemánu 25. beaivvi.
– Suoidnemánus boahtit fas ja deavdit Olmmáivákki Biru Baby jienaiguin! BIRU BABYYYY! lohká Hánná preassadieđáhusas man Riddu Riđđu lea almmuhan.
Lávddit maid loktanit
Maŋemus jagiid lea joavkkus leamaš fokus ovdánahttit sin dáiddalaš ovdanbuktima ja leat almmuhan EP-skearruid, musihkkavideoid ja surrealisttalaš lávdeláhtten.
– Biru Baby lea okta Sámi čaffadeamos joavkkuin lávddis. Sis lea «girl-power» ja dihtet movt galget guoimmuhit gehččiid. Sihke Driva lávdi ja Riddulávdi loktana ja mii illudit dasa, muitala festiválahoavda Karoline Trollvik preassadieđáhusas.
Eará joavkkut, maid leat ovdalaččas almmuhan Riddu Riđu prográmmas boahtte geasi, leat Resirkulert, Baker Boy, Felgen Orkester, Solju ja Amanda Delara.
