Leairauđas Vuorašnjárggas Álttás mannan geasi luovvanii muohtasuddama ja geađgeguorpmi geažil.
Geassemánu goalmmát beaivvi diibmá fierai leairauđas merrii Vuorašnjárggas Álttá suohkanis. Ii oktage olmmoš duššan, muhto uđas njámastii gávcci viesu, geainnu ja stuora eananbihtá merrii.
Norgga čázádat- ja energiijadirektoráhta (NVE) fágajoavku lea gávnnahan dál manne eanan luovvanii ja fierai merrii. Dat lei danne go eatnamii, mii juo ii lean stabiila, ledje buktán geađgegurpmiid ja deavdán eatnama bartahuksema oktavuođas 2015:s, ja go olu muohta vel suttai eatnamii diibmá.
NVE bijai uđđasa maŋŋel sierra fágajoavkku árvvoštallat sivaid maŋŋel uđđasa.
Altapostena dieđuid mielde ledje buktán birrasii 80 guorbmebiilaguorpmi geađggi dahje čievrra viessosadjái. Suohkana huksenossodagas eai loga bartaeaiggáda ohcan nie olu eatnama deavdit dohko.
