Sámediggepresideanta Aili Keskitalo oaivvilda UiT Norgga árktalaš universitehta leat dehálaš gaskaoapmin juohkit ipmárdusa álgoálbmogiid, industriija ja našunála eiseválddiid gaskkas.
Sámediggepresideanta Aili Keskitalo oaivvilda UiT Norgga árktalaš universitehta leat dehálaš gaskaoapmin juohkit ipmárdusa álgoálbmogiid, industriija ja našunála eiseválddiid gaskkas.
Mánnodaga álggii konferánsa UiT Norgga árktalaš universitehtas man fáddá lea ráđđádallan, álgoálbmot ja industriija, čállá UiT Norgga árktalaš universitehta neahttasiiddus.
– Mii dárbbašit sierra iešheanálaš jienaid, dutkama ja gealbohuksema, ja akademiija lea dehálaš gaskaoapmin hástaleaddji dillái, muitala Aili Keskitalo. Son oaivvilda dehálažžan ja áigeguovdilin čuvget váttisvuođaid nu go dahkkui konferánssas.
Riiddut sáhttet čuožžilit
FN-raporttas, mii almmuhuvvui dán vahkku, de logai ON erenoamášráđđeaddi Victoria Tauli-Corpuz vuorjašuvvat industriija ovdáneami davviálgoálbmogiid ektui.
– Mii oaidnit riidduid mat sáhttet čuožžilit energiijamolsašumis, nu movt bieggamillohuksema ja boazodoalu gaskka. Goappašat ealáhusat gáibidit viiddis eatnamiid, muhto eai mis leat beare ollu eatnamat, dajai Aili Keskitalo.
Juogadit vásáhusaid
Konferánssas deaivvadedje álgoálbmogat geat bohte Kanada davimus guovlluin gitta Austrália lulimus guovlluin. Doppe juogadedje álgoálbmogiid ja industriija vásáhusaid.
– Dakkár vásáhusjuogadeapmi lea dehálaš. Vaikko leat stuora erohusat Norggas, Kanadas, Austrálias ja Ruoššas, de sáhttit oahppat ollu nubbi nuppis, dajai sámediggepresideanta.
