– Dehálaš dohkkehit sohkabeliid erohusaid

– Mu mielas lea dehálaš dohkkehit guđet guimmiideaset leaš dal nissonolmmoš vai dievddu. Olmmoš galgá dohkkehit nuppi ja dohkkehit sohkabeali erohusaid. Dat lea mu mielas dehálaš, lohká Norgga Boazosápmelaččaid Riikkasearvvi jođiheaddji Ellinor Marita Jåma.

Boazodoalus hástalusat

Son ii loga čiegus áššin ahte boazoealáhusas lea ain guhkes mátki olahit dásseárvvu, muhto deattuha ahte lea vejolaš olahit dásseárvvu sihke ealáhusas ja organisašuvnnas.

– Nissonolmmoš ja dievdoolmmoš leaba goabbatláganat, muhto dattetge lea vel deháleabbo olahit dásseárvvu ja dohkkehit goabbat guoimmi erohusaid, dadjá Jåma.

Ávkkástallat sohkabeliid kivrodagaid

Ellinor Marita Jåma oaivvilda ahte sáhttá sohkabeliid kivrodagaid ávkkástallat, ja dan beaivvi go nissonolmmoš dohkkehuvvo dássálaččat dievdduin, de lea maid álkit olahit dásseárvvu.

– Mii bargat dásseárvvuin ja geahččalat stimuleret ortnegiid bokte. Láhčit dili nu ahte nissonat sáhttet leat oassin boazodoalu árgabeaivvis ja dieđusge movttiidahttit sin vuoruhit boazodoalu, lohká Jåma.

Loga maid: – Eat leat vel olahan dásseárvvu

Loga maid:  – Berret čájehit solidaritehta eará álgoálbmotnissoniidda

Ii vajáldahttit árvvuid

Ellinor Marita Jåma lea bajásšaddán boazodoalus ja sus leat guokte oappá. Son ii loga čieggusáššin ahte boazodoallu lea fysalaš gáibidahtti bargu, muhto jus dohkkehuvvo sohkabelliid árvu, de geahpeda maid dili.

– Mun ja mu oappát eat leat goassege dovdan iežamet heajubun, vaikko áhčči lea soames gerddiid gullan ahte lea rávki go leat dušše nieidamánát. Áhčči lea álohii deattuhan ahte sus lea lihkku go leat golbma nieidda sus, ja atná min seamma árvvus go gánddaid. Mu mielas lea dehálaš deattuhit sohkabeliid árvvu ja doalahit fokusa dásseárvui. Ii galgga goassege vajáldahttit árvvuid, deattuha Ellinor Marita Jåma.