-Almmuhus-
-Almmuhus-
KULTUVRA– Dehálaš doarjut eará dáiddáriid

– Dehálaš doarjut eará dáiddáriid

-

-

Beakkán artista Elle Márjá Eira lea okta dain geat čuojahit Kárášjoga dáiddaskuvlla doarjjakonsearttas.

– Mu mielas lea hui dehálaš ahte mun gii ieš lean dáiddár, doarjjun eará dáiddáriid. Šaddá hui somá searvat, lohká Elle Márjá Eira, guhte čuojaha Dáiddaskuvla doarjjakonsearttas «Dáiddárat dorjot dáiddáriid» lávvardaga.

 

Lagas oktavuohta Kárášjohkii

Eira lea orron guhtta jagi Kárášjogas, go barggai NRK Sámis, nu sus leat olu oahppásat dáppe. Son maiddái dovdá olbmuid geat ovdal leat vázzán dáiddaskuvllas.

– Oažžu lohkat ahte mus lea hui lagas oktavuohta Kárášjohkii. Ja go oidnen ahte Magnus Vuolab jearai facebook bokte ahte leat go artisttat geat sáhtašedje čuojahit doarjjakonsearttas, ja mun de dieđihin sutnje ahte searvvašin áinnas, muitala Eira.

 

Illuda čuojahit

Artista gal jáhkká leat ávki dákkár konsearttas.

– Vuosttažettiin de mii artisttat čoahkkanit ja dáinna lágiin čalmmustahttit skuvla, dasa lassin livččii vel buorre jus boađášii sisaboahtu skuvlii, čilge Elle Márjá, guhte čuojaha nuvttá.

– Mun illudan boahtit čuojahit ja illudan juogadit lávddi daid eará artisttaiguin. Sávan ahte bohtet olu olbmot ja ahte šaddá fiinna eahket, lohká son.

Konsearttas čuojahit Kararockers, Nostalgiija gánddat, Pondus, Elle Márjá Eira & Morten Pettersen, Amund Johnskareng, Eva Jeanette Iversen, John Arvid Johnskareng, Werner Larsen Trio, Johan Anders Bær ja Per Tor Turi.

 

– Liggii váimmu

Doarjjakonsearta lágiduvvo danne go Kárášjoga dáiddaskuvllas ledje ruhtaváttisvuođat ovdalaš juovllaid. Skuvllas váilui 750 000 ruvnno vai sáhttet čađahit dán skuvlajagi. Sii lihkostuvve oažžut doarjaga Kárášjoga gielddas, Finnmárkku fylkagielddas ja Sámedikkis.

Dáid hástalusaid geažil dat Magnus Vuolab ja Terje Tretnes fuomášeigga ahte lágideaba doarjjakonseartta skuvlla ovddas, mas buot dienas galgá mannat skuvlii.

Kárášjoga dáiddaskuvlla rektor Eva Aira lea ilus ovdal konseartta.

– Lea oba somá ja miellagiddevaš go sámi dáiddárat dollet dákkár doarjjakonseartta. Lei illudahtti juovlamánus go bođii diehtu ahte Finnmárkku fylkka maid juolluda ruđaid doarjut dáiddaskuvlla. Magnus Vuolab ja su joavku livčče sáhtán geassádit lohpiduvvon doarjjakonseartta lágideamis, muhto dan eai dahkan go háliidit doarjut Kárášjoga Dáiddaskuvlla, lohká rektor Eva Aira ja lohká dat liggii su váimmu.

 


ILLUDA : Kárášjoga Dáiddaskuvlla rektor Eva Aira lea ilus go sámi dáiddárat konseartta bokte dorjot sin skuvlla.
Govven: Astrid Helander

Sávvá 13 olbmo ohcat skuvlii

Rektor ii dieđe vuos leago skuvlla heaittihan áitta leamaš buorre dahje heajus máinnus skuvlii.

– Ohcanáigi lea easkka geassit. Mun dieđán muhtumat áigot vázzit nuppi jagi , ainge lea hállan dan birra. Mii eat dieđe sihkkarit ovdalgo oažžut ohcama. Ohcanskovi gávdná skuvlla interneahtasiiddus ja sáhttet sáddet ohcamuša dál juo, lohká rektor Eva Aira ja sávvá unnimus 13 olbmo ohcet skuvlii boahtte skuvlajahkái.

 

Sávvá skuvlla bistit agibeaivvi

Kárášjoga Dáiddaskuvlla ásaheami jurdagat álggahuvvojedje go Máze-dáiddárjoavku ásahuvvui 1980-logus. Das rájes lea áŋgirit bargan ceggen dáiddaskuvlla ja skuvla ráhpui 2011.

– Lea viđát jahki go skuvla bistá ja sávašin skuvla bisttašii agibeaivvi, sávvá rektor Eva Aira.

 

Konsearta lágiduvvo Kárášjoga servodatviesus lávvardaga ođđajagimánu 16. beaivvi, diibmu 20.30-02.00. Ahkemearri: 18 jagi, sisabeassan: 300 ruvnno.

-Almmuhus-