-Almmuhus-
OĐĐASAT– Dehálaš arena

– Dehálaš arena

-

-

NSR nuoraidlávdegotti jođiheaddji Ánde Trosten oassálastá Nuoraid Davviriikkalaš Ráđi čoahkkimis Reykjavikas Islánddas.

Dán jagi čoahkkima fáddán lea «Demokratiija ja nuoraid oassálastin», ja álggahuvvo seminárain mas lea seamma fáddá. Čoahkkin álgá golggotmánu 23. beaivvi ja bistá 25. beaivái.

– Dát fáddá lea áibbas áigeguovdil! Jus sámi nuoraide galgá sihkkarastot dásseárvosaš oassálastin sihke sámi ja davviriikkalaš demokratiijas, de fertejit sámi nuorat beassat mielde mearrádusproseassaide áššiin mat gusket midjiide. Dákko sáhttá ain olu dahkat sihke Sámis muhto maiddái obbalaččat davviriikkain, dadjá Ánde Trosten.

 

Sámis hárjánan ovttasbargat

Čoahkkin dollo oktanagas go Davviriikkalaš Ráđđi doallá iežas sešuvnna Reykjavikas golggotmánu 27.-29- beivviid. Nuoraid Davviriikkalaš Ráđis leat miellahtut Danmárkku, Suoma, Fearasulluid, Ruonáeatnama, Islándda, Norgga, Ruoŧa ja Ålándda nuoraidbellodagain.

– Sámis leat áiggi mielde šaddan oalle čeahpit ovttasbargat davviriikkalaččat, ja mii leat guhká ovttasbargan riikkarájáid rastá siskkáldasat Sámis, ja maiddái lea sámiin ja inuihtain ovttasbargu. Dát čoahkkin lea dehálaš arena davviriikkalaš ovttasbarggu dáfus ja midjiide lea dehálaš ahte dán ráđđái ásahuvvo maid sámi ovddasteapmi. Dál ii leat oktage sámi miellahttuorganisašuvdna Nuoraid Ráđis, lohká Trosten.

 

Buorit ovttasbargoguoimmit

Ovdalaččas leat sámi nuoraidorganisašuvnnaide fállon observatevrarolla Dávgi váldoorganisašuvnna bokte, dát organisašuvdna ii leat šat doaimas. 2015 čoahkkimis oassálastá NSR-N observatevrastáhtusiin, ja lea maiddái áidna sámi nuoraidorganisašuvdna doppe.

– Mii diehtit ahte Nuoraid Davviriikkalaš Ráđđi lea bargan ja ain aktiivvalaččat bargá oččodan dihte Ruoŧa ja Suoma ratifiseret ILO 169, ja danne leat sii buorit ovttasbargoguoimmit midjiide. Dattege lea dehálaš čalmmustahttit álgoálbmogiid oassálastima dehálašvuođa, ja fertet maid oažžut sámi lahtuid ráđđái vai mii maid beassat iežamet ášši ovddidit davviriikkalaš ovttasbarggus, loahpaha Trosten.

 

-Almmuhus-