Nu lohká FeFo direktevra Jan Olli ja ávžžuha stivrra guoddalit Unjárgga-duomu Alimusriektái, go oaivvilda ášši fertet alimus dásis čielggaduvvot.
Nu lohká FeFo direktevra Jan Olli ja ávžžuha stivrra guoddalit Unjárgga-duomu Alimusriektái, go oaivvilda ášši fertet alimus dásis čielggaduvvot.
FeFo lea árvvoštallan duomu prinsihpalaš beliid váikkuhusaid Finnmárkui.
Mearrádus ávžžuhit guoddalit lea árvvoštallama mielde maid advokáhttafitnodat Hjort lea dahkan.
FeFo-direktevra Jan Olli oaivvilda dehálažžan oažžut prinsihpalaš čielggadeami danne go meahcceduopmostuollu árvvoštallá stáhta disposišuvnnaid eará láhkái go Finnmárkkukommišuvdna ja ovdalaš guorahallamat čadnon dasa.
Váikkuha eará áššiide
Áššis lea maiddái praktihkalaš ja lágalaš mearkkašupmi áššiide mat bohtet.
Duopmu buvttiha viidáseappot olu váikkuhusaid sámi beroštumiide ja bissovaš ássiid beroštumiide Finnmárkkus muđui.
– Duopmu lea mávssolaš boahttevaš áššiide Finnmárkkus, ja váikkuha dasa movt bissovaš ássit geavahit fylkka. Danne lea dárbbašlaš čielggadit ášši Alimusrievttis. Jus mat duopmu bisuhuvvo, de sáhttet váikkuhusat Finnmárkku álbmogii, ja sáhttá báhcit dakkár ráfehisvuohta álbmogii maŋit áigái lei go galgat guoddaluvvot, lohká Olli
Boađus ii leat deháleamos
Olli lohká maid ahte ii leat deháleamos mii šaddá boađusin áššis.
– Eahpitkeahttá movt duopmu šaddá, de lea deháleamos ahte lea alimus dásis čielggaduvvon, ja go dat dahkko, de lea ášši easka áibbas čielggas, lohká Olli.
Dasa lassin lea boazodoalloorohat 5/6 dieđihan ahte áigot julggaštit áššeoasálašveahki jus ášši guoddaluvvo Alimusriektái.
Duopmu ođđajagemánu 23. beaivvi 2017 doahttalii Unjárgga gilisearvvi das ahte «bissovaš ássi álbmogis ráddjejuvvon guovllu siskkobealde, earret muhtun spiehkastagaid, okto lea riekti hálddašit geavahanvuoigatvuođaid meahccevalljodagaid nággoguovllus».
FeFo stivra galgá boahtte vahkku mearridit galget go guoddalit duomu Alimusriektái.
– Eat sáhte geassádit
Finnmárkkukommišuvdna duođaštii rivttiid Unjárgga gilisearvái, muhto celkkii ahte FeFo galgá hálddašit guovllu.
Gilisearvi guoddalii meahcceduopmostullui, mii duomus celkkii gilisearvái vuoigatvuođaid.
Unjárgga gilisearvvi jođiheaddji Gunn Britt Retter ii sáhte vuos nu ollu dadjat ášši birra, ovdal go mearriduvvo bissu go meahcceduopmostuolu duopmu vai guoddaluvvo go. Muhto sii leat gergosat.
– Ášši lea juo guhká mannan ja mii eat sáhte dál geassádit, ja leat gergosat čohkket fámuid, lohká Retter.
