Dihtet go ahte čállit teakstadieđu mátketelefuvnnain vuojidettiin lea seamma várálaš go juhkanvuođas vuodjit.
Eatnasat dihtet ahte ii leat lohpi hupmat dahje čállit dieđu mátketelefuvnnain vuojidettiin. Goitge lohket badjel bealli jerrojuvvon olbmuin gaskal 23 ja 35 jagi ahte sii sihke čállet teakstadieđuid ja gehččet mii dáhpáhuvvá sosiála mediaid vuojidettiin biillain. Čájehan dihte man várálaš dát lea, de hástalii NAF golbma nuorra biila vuoddji geahččalit dán dahkat NAF hárjehallanbána alde.
– Nuorra biilavuoddjit hirpmáhuvve go oidne man olu heajut biilavuoddjit sii šadde go čálle teakstadieđu mátketelefuvnnain vuojidettiin, lohká Morten Fransrud, gii fágaovddasvástideaddji NAF johtolathárjeheamis, preassadieđáhusas.
Heaggavárálaš
Fransrud čilge ahte nuorra biilavuoddjit galge geahččalit čállit teakstadieđu «Lean ruovttus diibmobeali geahčen, klemz». Jođáneamos nagodii čállit dieđu 23 sekunddas. Jus dán lei dahkat go lea vuodjimin 80 km/d geainnu alde, de livččii vuoddji vuodján bealle kilomehtera nu ii leat ollásit čuvvon mielde das mii geainnu alde dáhpáhuvvá.
– Oba olu sáhttá dáhpáhuvvat go vuoját bealle kilomehtera. Lea njulgestaga heaggavárálaš čállit teakstadieđu vuojidettiin, dadjá Fransrud.
Rokčejedje hárjehallanbiilla
Nuppi oasis geahččaleamis galge ges nuorra biilavuoddjit geahččalit lohkat ovtta teakstadieđu ja vástidit dan vuojidettiin. Diehttelasat válddii čállin olu fuomášumi, ja buohkat šadde mealgat heajut biilavuoddji dan botta go čálle:
– Nagodeimmet rokčet ovtta hárjehallanbiilla go dán leimmet geahččaleami, muitala Morten Fransrud.
Seamma go 0,8 promille
Dutkan mii lea čađahuvvon USAs čájeha ahte geavahit mátketelefuvnna vuojidettiin lea seamma go vuodjit go dus lea 0,8 promilla.
– Juste nu mo sii geat vudjet go leat juhkan, de eai jáhke sii geat geavahit mátketelefuvnna vuojidettiin dán čuohcat sin vuodjimii. Buohkat berrejit váldit duođalaččat ja diktit mátketelefuvnna orrut vuojidettiin. Jus gullá riŋgesteame telefuvdna, de divtte dan orrut dassá joavddat dahje bisánit, ávžžuha Morten Fransrud duođalaččat.
NAF filmma geahččaleamis sáhtát geahččat dás:
