Hilde Skancke Pedersen, Sámi Dáiddaguovddážis (SDG), sierradáiddačájáhus. dáidda, dáiddariggi
Dáiddáris Hilde Skancke Pedersenis lea stuorra sierračájáhus Sámi Dáiddaguovddážis (SDG) boahtte giđa masa dárbbaša buot čájáhussaji.
Sámi Dáiddaguovddáš (SDG) lea dál almmuhan iežas 2021 čájáhusprográmma. Dán jagi leat olu sierračájáhusat, ja vuosttamuš dán čájáhusráiddus lea Hilde Skancke Pedersen. Sus lea hušša. Lea olu bargu maid galgá gárvet lohpiduvvon áigái.
– Mus ii leamaš guhkes áigái sierračájáhus. Dán SDG čájáhussii buvttán sihke uhca ja stuorra dáidagiid vai šaddá muhtinlágan rytma. Lean geavahan iešguđetlágan dáiddalaš teknihkaid dahje vugiid. Uhcimus čájáhuslanjas deavdá okta dáiddariggi olles lanja ja dan čáhppes latnjii bijan maid eará dáiddarikki dahje installašuvnna. Stuorámus čájáhuslanjas lea maid ođđa dáiddariggi ja maiddái eará dáidagat, čilge Hilde Skancke Pedersen.
Son muitala ahte fáddá su dáidagiin lea luonddu man vuolggasadji lea sámevuohta ja sámi kultuvrra mii manná dego uhcit eanet dego rukses árpu olles čájáhusas.
Hilde Skancke Pedersen muitala son dáid maŋimuš jagiid ii leat astan iežas bargguin bargat, go lea bargan Sámi Dáiddačehpiid Searvvi ovddas ja eará oktasaš prošeavttaiguin. Dovdosamos dáidda maid son lea ráhkadan, lea labyrintaseaidni Sámedikki dievasčoahkkinlanjas.
