-Almmuhus-
-Almmuhus-
OĐĐASAT Deattu­hit ahte dál ii gierdda šat boazo­doallu eambbo sisa­bahkke­miid 

Deattu­hit ahte dál ii gierdda šat boazo­doallu eambbo sisa­bahkke­miid 

-

-

– FeFo deattuha ahte dál ii gierdda šat boazodoallu eambbo sisabahkkemiid Finnmárkkus, ja danin gielddašat eambbo bieggamilloásahemiid Finnmárkui, cealká FeFo stivra. 

Finnmárkkuopmodat (FeFo) stivra mearridii mannan stivračoahkkimis sáddet dieđu Stuorradikki energiija- ja biraslávdegoddái ahte FeFo stivra háliida leat erenoamáš várrugas addit eanaeaiggátlobi boahttevaš bieggamilloceggemii.

Stuorradikki energiija- ja biraslávdegoddái meannuda farga Stuorradiggedieđáhusa 28 (2019-2020) – Bieggafápmu nannámis. Dan olis celkkii Finnmárkkuopmodat (FeFo) stivra lávdegoddái ahte sii háliidit leat hirbmat várrugasat addimis eanaeaiggátlobi cegget bieggamilluid Finnmárkkus.

– FeFo deattuha ahte dál ii gierdda šat boazodoallu eambbo sisabahkkemiid Finnmárkkus, ja danin gielddašat eambbo bieggamilloásahemiid Finnmárkui. Lagabui olles Finnmárkkuopmodat lea boazodoaluareála, muhto dál lea stuorra oassi daid ovddeš boazodoaluareálain juo váldon eará atnui, čállá FeFo stivra, direktevra Jan Olli bokte, preassadieđáhusas.

Eanaeaiggát FeFo háliida maid suddjet finnmárkulaččaid meahcástallama, olgodaddaneallima ja mátkeealáhusaid. Guovlluin, gosa sisabahkkemat eai leat joavdan, lea stuorra árvu sihke boazodollui ja meahcástallamii. Bieggamilluid, linjáfierpmádagaid ja ruossut rássut geaidnohuksemiid váikkuhusat sáhttet jáhkkimis bilidit luonddumáŋggabealatvuođa, duvdit eret boazodoalu ja njeaidit guovllu meahcástallama ja olgodaddaneallima. Eanaeaiggádis ja hálddašeaddjis, FeFos, lea stuorra ovddasvástádus áimmahuššat boazodoalu boahtteáigái. Finnmárku lea sámi váldoguovlu ja lea dehálaš sámegiela, ealáhusa ja kultuvrra ceavzimii.

– Finnmárkkuláhka ja bajábealde namuhuvvon hástalusaid dihtii háliida leat FeFo hui várrugas addimis eanaeaiggátlobi boahttevaš bieggafámu huksemiidda, cealká FeFo. 

Loahpas čujuha FeFo Stuorradiggedieđáhusa 28 (2019-2020) siidu 78 ahte FeFo ii leat «øvrige statlige eiere» (eará stáhtalaš eaiggádat), muhto ovddasta ja hálddaša Finnmárkku álbmoga ovddas Finnmárkku guovllu.

- Advertisement -
-Almmuhus-