-Almmuhus-
OAIVILATDeatno­gátte Sámiid Searvvi/Tana­bredden same­forening jahke­čoahkkima 12.1.2023 cealkámuš: 

Deatno­gátte Sámiid Searvvi/Tana­bredden same­forening jahke­čoahkkima 12.1.2023 cealkámuš: 

-

-

– Doarjja min boazo­doalliide

– Deatnogátte sámesearvi ii dohkket ahte eiseválddit oaffaruššet lonukeahtes luonddu ovdamunnin energiijafitnodagaid huksejeaddjiide geain lea ulbmil olahit aivve stuorra ekonomalaš vuoittuid, čállá searvvi jahkečoahkkin cealkámušas. 

Bieggafápmorusttegat ja areálagáržžideamit – guoskevaš beroštumit galget konsulterejuvvot. NVE – Norges vassdrags- og energidirektorat bovdii skábmamánus 2022 čoahkkimiidda Davvi Siidda ja Gáŋgaviikka gielddaiguin ulbmilin álggahit fas proseassaid huksehusaid Davvi vindkraftverk, Digermulen vindkraftverk, Laksefjorden vindkraftverk ja Sandfjellet vindkraftverk. Boazodoalloorohagat (9, 13, 14A, 14) maidda gusket areálagáržžideamit, ledje bovdejuvvon.

Boazodoalu ovddasteaddjit moite garrasit go NVE lei bovden álggahančoahkkimiidda almmá konsultašuvnnaid haga boazodoaluin ja eará sámi berošteaddjiiguin, numo Sámeláhka § 4-4 gáibida. Eaige lean bovdejuvvon konsultašuvnnaide ovdalgo Davvi Siidda gielddastivra mearridii ávžžuhit joatkit bieggafápmorusttegiid meannudemiid. Boazodoalloorohagat gulle álggos muhtin prošeavttaid birra media bokte!

Deatnogátte sámesearvi rámida min boazodoalloolbmuid go sii áššálaččat čujuhedje proseassaid boasttuvuođaide ja bukte gáibádusaid:

• NVE galgá orustahttit bieggafápmorusttegiid áššemeannudeami.

• Bieggafápmofitnodagat galget orustahttit huksemiid go proseassat leat váilevaččat.

• Proseassaboasttuvuođat leat eatnat ja duođalaččat, maiddái go gielddat eai leat reguleren ohccojuvvon areálaid bieggafápmorusttegiidda plána- ja huksenlága mielde, mii mearkkaša ahte proseassat eai leat lobálaččat.

• Min boazodoalloolbmot celke maid čielgasit ahte sii eai oassálastte áššeproseassaide mat álggadettiin jo rihkkot lágaid ja njuolggadusaid, ja ahte sii eai oassálastte dás duohko duođaštussan láhkarihkkumiidda mat vahágahttet sin bearrašiid ja maŋisboahttiid birgenvuođu.

Duođalaš boasttuvuođat dahkkojit jus gielddat garvet lágalaš geatnegasvuođaid sisabahkkemiin. Lea ságas olbmuid birra geat vásihit áitagiid sin birgenláhkái, vaikke vel sin boazodoalus lea geavahan- ja guođohan vuoigatvuohta – maiddái Davvi Siidda ja Gáŋgaviikka gielddain!

Čálalaš váidalus Gáŋgaviikka gildii váilevaš konsultašuvnnain Sandfjellet bieggafápmorusttega hárrái, ii leat vástiduvvon numo gáibádus lea hálddašanlágas. NVE ja gielddat eai lean ollašuhttán sámelága eaige hálddašanlága gáibádusaid ovdal bovdejumi álggahančoahkkimiidda. Čoahkkimat šadde danne boazodoalu ovddasvástideaddjiid beales «bajásčuvgehussan» konsultašuvnnaid geatnegasvuođaid birra gielddaide, NVE:i ja huksejeaddjiide Fred Olsen Renewable, St1, Grenselandet AS.

Lea heahpat go NVE «ii dovdan» láhkamearriduvvon konsultašuvdnageatnegasvuođaid. NVE lei galgat diehtit buorebut. Áššeproseassat areálagáržžidemiin lea fágalaš ovddasvástádussuorgi mii lea fápmuduvvon Oljo- ja energiijadepartemeantta bokte. Dát lea seammá departemeanta mii ii doahttal Alimusrievtti duomu Fovsen-áššis. Luohttevašvuohta min eiseválddiide lea skierbmugoahtán.

Deatnogátte sámesearvi ii dohkket ahte eiseválddit oaffaruššet lonukeahtes luonddu ovdamunnin energiijafitnodagaid huksejeaddjiide geain lea ulbmil olahit aivve stuorra ekonomalaš vuoittuid.

Min álbmogii lea luondu divrras vuođđu guođohanealáhussii, meahcásteapmái, kultuvrii, gillii, dearvvašvuhtii, loaktimii ja ássanmoktii. Sii leat áiggiid čađa vásihan ahte luonddu várit, meahcit, jogat ja vuonat oktan jahkeáigodagaid valljodagaiguin olbmuide ja ealliide, addet daid stuorámus vuoittuid: birgenvuođu, loaktima ja ássanmovtta.

-Almmuhus-