Oarje-Finnmárkku ođđa ambulánsafanas lea fargga gárvvis meara ala biddjot.
– Dát lea min riikka eanemus ođđaáigásaš ambulánsafanas. Boahtte mánus galgá dat leat doaimmas. Stašuvdna lea Láhpis, dadjá Finnmárkku buohcciviesu Pre Hospital klinihkkajođiheaddji Jørgen Nilsen Ávvirii.
Ođđa argabeaivi
Son muitala ahte fanas livččii galgan jo doaimmas geasset, muhto korona geažil maŋŋonii.
– Šaddá ođđa árgabeaivi bargiide. Lea erenomáš fanas mii lea huksejuvvon. Mii leat geahččalan hábmet dan nu bures go vejolaš dárbbu mielde. Das lea sierra stuorra ođđaáigásaš dikšunlatnja, ja stuorra deahkka mas helikopter sáhttá viežžat olbmo. Ii sáhte seaivut gal dan ala, muhto álkit lea dál evakueret olbmo eret fatnasis, dadjá Nilsen.
Lea Maritime Partner, Ålesundas mii lea huksen fatnasa, mii lea ožžon nama «Thea Jensen».
