Golggotmánu logut čájehit ahte dán jagi leat eanet finnmárkulaččat bargguiguin go diibmá dáid muttuid.
Golggotmánu logut čájehit ahte dán jagi leat eanet finnmárkulaččat bargguiguin go diibmá dáid muttuid.
Dál leat 2,9 proseantta finnmárkulaččain bargguhisvuođas, dahje 1157 olbmo. Finnmárku lea dál riikkagaskameari dásis. Bealis Finnmárkku gielddain, lea unnit bargguhisvuohta go diibmá.
Dát boahtá das go guolástanealáhusas bargoveahka rievddada áigodagaid mielde, čállá NAV Finnmárku.
– Lea maiddái buorre go leat almmuhuvvon eanet rabas virggit, dadjá Eva-Lill Johansen Margit NAV Finnmárkkus.
Golggotmánus ledje 354 rabas virggi almmuhuvvon Finnmárkkus. Eanas dain ledje Álttás (81), dasto Hammerfeasttas (67), Máttá-Várjjagis (51) ja Čáhcesullos (36). Eanaš virggit gulle dearvvašvuođa, dikšun ja fuollasuorgái.
Golggotmánus ledje gávpe- ja vuovdinsuorggis, oahpahussuorggis ja dearvvašvuođasuorggis unnimus bargguhisvuohta.
Maiddái snihkkensuorggis, eanandoalus, vuovdedoalus ja guolástanealáhusas lei unnit bargguhisvuohta. Industriija-, kantuvrrabargo-, inšenevra- ja ikt-fágasurggiin ges lassánii bargguhisvuohta.
– Stuorámus bargguhisvuohta lea industriijaealáhusas. Dan suorggis leat 250 olbmo bargguid haga, dadjá Eva-Lill Johansen Margit.
Eanemus ja unnimus
Gáŋgaviikkas leat eanemusat bargguhisvuođas 7,7 proseanttain, dasto Ákŋoluovttas 7,3 proseanttain ja Guovdageainnus ges 5,4 proseanttain.
Unnimus bargguhisvuohta lea Láhppis ja Mátta-Várjjagis gos leat 1,7 proseantta bargguhisvuođas.
