Disdaga maŋŋelgaskabeaivvi bođii diehtu ahte Porsáŋggus lea gávccát olbmui njommon koronadávda, ja son geas dávda lea duođaštuvvon lea dearvvasvuođabargi.
Porsáŋggu gielda oaččui disdaga duođaštusa ahte okta sin bargiin lea buohccán koronadávddain. Bargi geasa dávda lea njommon bargá gieldda buhcciidruovttus. Njoammunguorranjoavku lea guorran njoammuma olggos gilis.
– Nu go mii dovdat njoammungeainnu, de lea dat ge njoammun boahtán Hámmárfeasttas. Son ii leat leamaš oktavuođas pasieanttain geas dávda lea duođaštuvvon, nu ahte njoammun boahtá njuolga Hámmárfeasttas, čilge gieldda ovdánahttinossodaga ja preassa ovddasteaddji Kjell Magne Rasmussen.
Rasmussen čilge ahte bargi lea isolerejuvvon ja leat dearvvasvuođabargit geat fuolahit buohcci dearvvašvuođa. Su lagasoktavuođat leat erremis ja njoammunguorranbarggut leat álggahuvvon.
Leamaš barggus
Rasmussen duođašta Ávvirii ahte dearvvasvuođabargi lea leamaš barggus buhcciidruovttus maŋŋel go lei Hámmárfeasttas, gos son jáhkkimis lea ožžon dávdda.
Son muitala ahte dan dihte leat sii bidjan johtui doaibmabijuid buhcciidruovttus.
– Bargit leat bargan measta birrajándora, vai mis leat doarvái bargit. Mii leat lasihan iskosiid, erremiid ja isolašuvnnaid. Mii leat maid bidjan johtui doaibmabijuid dan ektui mo bargit barget buhcciidruovttus. Sii barget joavkkuin, geavahit njálbmesujiid ja mis leat reaiddut dearvvasvuođasuorggis maid dál leat bidjan johtui, čilge Rasmussen.
Porsáŋggus leat váldán 105 koronaiskosa mánnodaga ja disdaga, ja gaskavahku iđida ledje 30 iskosa bohtosat čielgan.
– Buot 30 maid dál oaččuimet leat negatiiva. Mii joatkit ain intensiiva iskkusváldimiin, dadjá gieldda ovdánahttinossodaga ja preassa ovddasteaddji.
Maŋemus njoammumiid oktavuođas leat maid 54 olbmo erremis Porsáŋggus, dat leat gieldda bargit, lagasoktavuođat, bearrašat ja oapmahaččat.
– Mii hálddašit dili
Porsáŋggu buhcciidruovttus leat lasihan bargiid vai sáhttet doaibmat nu go dábálaččat. Sii leat maid dárkileappot dainna gii beassá sisa ja gii ii, ja oapmahaččat besset finadit dušše jus leat erenoamáš dáhpáhusat ja jus lea šiehtadus.
Rasmussen oaivvilda goitge ahte sii hálddašit dili.
– Nu guhká go njoammungeaidnu lea oahpis, de mii sáhttit lohkat ahte mii hálddašit dili. Jus livččii sáhka eambbo njoammunvejolašvuođain, de livččii vearrát. Dás duohko mii fertet kártet, erret ja iskat, dadjá son.
– Muhto go mii vuos leat ožžon njoammuma buhcciidruktui, de lea vejolaš ahte bohtet eambbo njoammumat, muhto mii sávvat dieđusge ahte eai daga dan, loahpaha gieldda ovdánahttinossodaga ja preassa ovddasteaddji.
