Deanučázádaga luossabreavaeaiggádat (DLB) ja Deanučázádaga luossabivdosearvi (DLS) stivrrajođiheaddji guovttos, Aslaksen ja Hansen, čilgeba soai háliideaba dikki mearridit leago Norgga stáhta rihkkon báikkálašolbmuid vuoigatvuođaid Suomain, sohppojuvvon Deanučázádaga bivddu láhkanjuolggadusaid.
Deanučázádaga luossabreavaeaiggádat (DLB) stivrrajođiheaddji Rune Aslaksen ja Deanučázádaga luossabivdosearvvi (DLS) stivrrajođiheaddji Hartvik Hansen čilgeba preassadieđáhusas manin sii leat stevdnen Norgga stáhta Dálkkádat- ja birasdepartemeantta bokte diggái.
– Mii leat guhká geahččalan oažžut politihkalaš čovdosa, nu gohčoduvvon Deanusoahpamuššii, mainna mii eat leat lihkostuvvan. Searvvit leat dasto 5.7.2019 stevdnen stáhta Dálkkádat- ja birasdepartemeantta bokte, čilgeba Aslaksen guovttos Hanseniin ja lasiheaba:
– Váiddaáššis háliidit iskat, rihkku go Deanusoahpamuš Suomain, báikeolbmuid bivdovuoigatvuođaid Deanučázádagas.
Duogáš áššái
Deanučázádaga luossabivddus leat guhkes áiggi árbevierut, ja bivdovuoigatvuohta lea dohkkehuvvon jo gonagaslaš čállosiin 1775:s.
Otná Deanulága (2014) vuođđun leat “lov om retten til fiskeri i Tanavassdraget” (1888), 1911 gonagaslaš mearrádus ja 1994 Alimusrievtti duopmu.
Lágat leat vuoigatvuođaláhka man ulbmilin lea váfistit erenoamáš vuoigatvuođaid mat guovlluolbmuin leat Deanučázádaga bivdui vuođđuduvvon lágaide, guhkesáiggi geavaheapmái ja dološvieruide.
Ii dárbbaš eahpidit dan ahte stáhta galgá doahttalit dán bivdovuoigatvuođa go dat meannuda čázádaga, maiddái go galgá soabadit Suomain Deanučázádaga bivddu.
– Deanučázádaga bivdu lea okta daid hárve báhcán sámi dološvierut mat ain lea doaimmas, ja mii lea erenoamáš dehálaš báikkálaš olbmuide. Dát dološvierru lea dál jávkamin, go stáhta boasttu vuođuštusain lea dahkan soahpamuša, mii rihkku min vuoigatvuođaid, čilgeba Deanučázádaga luossabreavaeaiggádaga (DLB) stivrrajođiheaddji guovttos Rune Aslaksen ja Deanučázádaga luossabivdosearvvi (DLS) stivrrajođiheaddji Hartvik Hansen.
Ii lean váldi juohkit vuoigatvuođaid earáide
Soai čilgeba viidásabbot:
– Dasto addá stáhta bivdovuoigatvuođaid mátta-suoma bartaoamasteaddjiide. Dákkár vuoigatvuohta ii leat stáhtas. Dákko bokte lea stáhta rivven bivdovuoigatvuođaid mat leat suddjejuvvon vuođđolágain, ILO nr. 169 soahpamušain, ja riikkaidgaskasaš siviila ja politihkalaš vuoigatvuođaid artihkal 27 soahpamušain. Dáid instrumeanttaid ektui ii čielggaduvvon ášši ovdal go mearrádus dahkkui.
Dorvvasteaba diggái
– Lea leamaš doaivva joksat politihkalaš čovdosa go Stuorradikki dárkkistan ja konstitušuvdna lávdegoddi galggai ođđasit meannudit Deanusoahpamuša. Ii dán vuoru ge čoavdásan ášši. Searvvit leat de váldán vuhtii ahte ii leat doaivva gávdnat dása politihkalaš čovdosa, lei dasto dárbbašlaš álggahit rievtti proseassa, danin ahte váfistit guovllu olbmuid ja min maŋisboahttiid vuoigtavuođaid, loahpaheaba Deanučázádaga luossabreavaeaiggádaga (DLB) stivrrajođiheaddji Rune Aslaksen ja Deanučázádaga luossabivdosearvvi (DLS) stivrrajođiheaddji Hartvik Hansen.
Dálkkádat- ja birasdepartemeanta vástida
– Mii vástidat dán gážaldaga nu jođánit go vejolaš. Justa dál leat olbmot luomus, nu ahte soaitá ádjánit ovdal go sáhttit vástidit, lohká Dálkkádat- ja Birasdepartemeantta gulahallan ráđđeaddi Jo Randen go jearrat kommentára dán áššái.
Veahá maŋŋelaš vástida birasministtar Ola Elvestuen ná.
– Dálkkádat- ja birasdepartemeantta lea áiddo ožžon stevdnema ja mii áigut dárkilabbot geahččat daid cuoigumiid. Mus eai leat justá dál makkárge kommentárat dán stevdnemii, lohká dálkkádat- ja birasministtar Ola Elvestuen.
