Fylkkasuohkan lágida fas fálaldatgilvvu beassat duohtandahkat huksenprošeavtta.
Fylkkasuohkan lágida fas fálaldatgilvvu beassat duohtandahkat huksenprošeavtta.
Finnmárkku fylkkasuohkan áigu hukset ođđa bátnedivššohaga Deanošaldái, mii galgá buhtadit boares divššohaga suohkanguovddážis ja Sieiddás.
Prošeavttas lei juo 2003:s fálaldatgilvu, muhto fylkkadikki politihkkárat válljejedje maŋidit prošeavtta go ledje beare divrras fálaldagat.
Geahččalit ođđasit
Dál lágiduvvo fas fálaldatgilvu, muhto prošeaktajođiheaddji Ole Benny Bakken dadjá iFinnmarkii ahte ii sáhte dovddahit prošeavtta bušeahttarámma, iige galle virggehasa bohtet dasa.
Son muitala baicce ahte sii leat jurddašan oktiičaskit daid bátnedivššohagaid mat juo gávdnojit Deanus, ja ahte šaddá buoret sadji dan ođđa divššohagas.
Bakken sávvá geassemánus juo álgit huksenbargguin, vai fylkkasuohkan beassá atnigoahtit klinihka boahtte jagi.
Ollu ođđa buorit
Guovlu gokko bátnedivššohat galgá huksejuvvot, lea sullii 670 njealjehasmehtera.
Vihtta dikšunlanja, steriila, laba ja eará gullevaš buorit bohtet ođđa bátnedivššohahkii, ja maiddái olgoareála gos boahtá leat earret eará biilaorustansadji.
Bátnedivššohat galgá huksejuvvot Rødbergluddii Deanušalddi guovddážis, dieđiha Finnmárkku fylkkasuohkan.
