Lappi EBI-guovddáža mielde lohpevuovdin álggahuvvo áramus miessemánu 11. beaivvi
Deanu čázádagas Suoma bealde eai vuovdigoađe guolástanbivdolobiid cuoŋománu 20. beaivvi, nu mo ovdal almmuhuvvon, koronavirusa dihtii, čállá Yle Sápmi. Lappi EBI-guovddáža mielde eai álggat vuovdima ovdal go áramusat miessemánu 11. beaivvi. Koronavirusii laktáseaddji spiehkastatláhkaásaheapmi sáhttá vel rievdadit áigetávvala. EBI-guovddážis sávvet ahte luossabivddu Deanus beasašii álggahit geassemánu álggus nu go dábálaččat.
– Nu lea maiddái Norgga bealde. Eat mii vuovdigoađe bivdokoarttaid ovdal go áramusat miessemánu 11. beaivvi. Mii leat ovttasbargan dán áššis, lohká Deanu čázádaga direktevra Hans-Erik Varsi Ávvir áviisii.
