-Almmuhus-
KULTUVRADeanu sámi mánáid­teáhter oažžu doarjaga 

Deanu sámi mánáid­teáhter oažžu doarjaga 

-

-

Sámediggeráđđi addá 150 000 ru doarjjan Deanu kulturskuvlla Sámi mánáidteáhterii.

Deanu kulturskuvlla sámi mánáidteáhteris lea ovddidanprošeakta man ulbmilin lea fállat kulturfálaldaga alla dásis mánáide ja nuoraide.

– Sámi mánáidteáhteris Deanus lea juo buorre fálaldat mánáide ja nuoraide, ja sis lea buot jagiid leamaš fokusis sámi dáidda, kultuvra ja giella iežaset fálaldagain. Lea illudahtti go sii háliidit ovdánit ain eanet ja buoridit iežaset fágalaš gelbbolašvuođa, dadjá sámediggeráđđi Silje Karine Muotka preassadieđáhusastis. 

Sámediggeráđđi Silje Karine Muotka. Govven :Åse M.P. Pulk/Sámediggi
Sámediggeráđđi Silje Karine Muotka. Govven :Åse M.P. Pulk/Sámediggi

– Barget ulbmildiđolaččat nu ahte sámegiella galgá oidnot

Prošeakta lea buvttadeame ja ráhkadeame stuorát čájálmasa ođđa Deanu šalddi rahpama oktavuođas ja vižžojuvvojit ámmátlaš dáiddárat ja kulturbargit geain lea báikkálaš ja regionála gullevašvuohta. Dainna lágiin sáhttet sii oažžut áigái sihke stuorát čájálmasa ja seammás buoridit gelbbolašvuođa sihke Sámi mánáidteáhtera bargiid gaskkas, muhto maiddái mánáid ja nuoraid gaskkas geat servet buvttadeapmái.

Sámi mánáidteáhter lea ásahus mii lea organiserejuvvon Deanu kulturskuvlla vuollásažžan, ja olahusjoavkun leat Deanu mánát ja nuorat. Teáhter geavaha sihke sámi kultuvrra ja giela čájálmasas, maid ovdal ge leat geavahan iežaset buvttademiin.

– Deanu kulturskuvla bargá ulbmildiđolaččat nu ahte sámegiella galgá oidnot, gullot ja geavahuvvot mánáid ja nuoraid gaskkas. Sii barget hui buori barggu, dadjá Muotka.

-Almmuhus-