Suoma ráđđehus nannii mannan gaskavahkku Deanu oalgejogaid bivdonjuolggadusa dán geassái. Dat mo luossamáddodagat dáin jogain vedjet, lea vuođđun bivdoáiggiide ja ráddjehusaide.
Suoma ráđđehus dieđiha ahte vuolimus oalgejogain, Buolbmátjogas, Veahčajogas ja Ohcejogas, lea luossanálit buori dilis ja girdet stággobivddu geassemánu álggus borgemánu lohppii.
Fierbmebivdu lea lobálaš dušše suoidnemánu lohppii golbma beaivve vahkus, guvttiin bivdosiin.
Badje-Deanus oalgejogaid luossabivdu lea čavggabut ráddjejuvvon. Doppe oaggun nohká borgemánu 20. beaivvi nu mo Deanus. Fierbmebivdosat leat oalát gildojuvvon.
Deanu oalgejogaid bivdonjuolggadusaiguin mearriduvvo bivddu eanemus mearri. Guolástangottit sáhttet ráddjet bivdoáiggi ja mearridit lobálaš bivdovugiid čavggabut go Deanu guolástansoahpamuš meroštallá.
Dán dieđiha Yle Sápmi
