-Almmuhus-
-Almmuhus-
-Almmuhus-
OĐĐASATDeanu Čearretsullui moratoria: – Turisttat galget Helándiriin jearrat oaggunlobi

Deanu Čearretsullui moratoria: – Turisttat galget Helándiriin jearrat oaggunlobi

-

-

Ellos Deatnu! -joavku lea julggaštan moratoria Deanu Čearretsullui, bajábealde Sámi Šaldi, lahka Ohcejoga. Moratoria mearkkaša dán oktavuođas dan, ahte ođđa bivdonjuolggadusat bissehuvvojit dan guovllus, mii lea Čearretsullo birastahtti čáhceviidodagain.

– Go mii oaidnit mo stáhtat vehá háválassii rievidit mis, de ii leat eará vejolašvuohta go fal bissehit sin, jos mii áigut ceavzit álbmogin. Moratorio julggaštuvvo Deanu čázádaga ođđa bivdonjuolggadusaid hárrái danin, go ođđa njuolggadusat áitet Deanuleagi sámiid buresbirgejumi, mas dehálaš oassin lea luossabivdu. Ođđa njuolggadusat leat ráđđádallon stánddaheamet, ja dat rihkkot álbmotrievtti ja Norgga ja Suoma vuođđolágaid, lohká Beaska Niillas Ellos Deatnu -joavkkus.

 

– Fámus dassážii go leat ráđđádallan

– Čearretsuolu lea Sámi suolu. Dán moratoriaguovllu guollebivddus ii oaččo goaridit sámiid vuoigatvuođaid iige beroštumiid. Dáid vuoigatvuođaide čujuhit earret eará álbmotrievtti konvenšuvnnat, julggaštusat, ávžžuhusat ja riikkaid vuođđolágat. Moratoria áigge guovllus gustojit min árbevirolaš riekteáddejupmi ja bivdovierut, joatká Áslat Holmberg.

Joavku cealká, ahte moratoria lea fámus dassážii go guovllu sámit leat ráđđádallan Deanočázádaga ođđa bivdonjuolggadusaid.

 

Turisttat galget Helándiriin jearrat

– Go juo ođđa bivdonjuolggadusat leat bissehuvvon, de lusta bivdolobit, mat eai leat báikkálaččat dohkkehuvvon, eai leat fámus dán guovllus. Turistabivdit galget baicce jearrat lobi mis Deanuleagi sápmelaččain ja erenomážit dán guovllu hálddašeaddji sogas, Helándiriin, lohká Beaska Niillas.

Joavku lea ceggen siidda sullui ja čuoččuhit sullos leat moratoria.

 

Ávžžuhit earáid čuovvolit

Joavku lágida maid álbmotgulahallama Busteldearpmis sotnabeaivve 25.6 dmu 14:00. Ellos Deatnu! -joavku ávžžuha Deanuleagi sápmelaččaid julggaštit moratoria maiddái eará guovlluide Deanu čázádagas.

Ellos Deatnu! joavku vuostálastá ođđa Deanu soahpamuša ja ovddida sámi iešstivrema ja báikkálaš hálddašeami Deanuleagis. Jovkui gullet báikkálaš sápmelaččat goappat bealde Deanu.

 

-Almmuhus-