-Almmuhus-
-Almmuhus-
OĐĐASATDeaivvadii Dálkkádat- ja birasdepartemeantta stáhtačálliin

Deaivvadii Dálkkádat- ja birasdepartemeantta stáhtačálliin

-

-

NBR jođiheaddji Ellinor Jåma lea moatti beaivvis nagodan oažžut našunála fuomášumi boraspirevahágiidda. Otne son galleda stáhtačálli Lars Andreas Lunde, fárrui lea ožžon vel TV2:a.

Ellinor Jåma lea maŋimuš beivviid stuoradikki politihkkáriid ja riikamediaid galledan ja čalmmustahttán boazodolliid boraspire- ja erenomážit goaskinhástalusaid. Dát čalmmustahttin lea boktán beroštumi ja odne deaivvada ge Dálkkádat- ja birasdepartemeantta stáhtačálliin Lars Andreas Lundein.

 

Jåma ii loga diehtit vuos mii boahtá ovdan čoahkkimis, muhto sávašii ahte stáhtačállis lea konkrehta plána maid buktá ovdan.

– Livčče vuogas jus sus livčče konkrehta čoavddus, konkrehta čoavddus mainna bargat viidásat, dadjá Jåma.

 

Jåma ii lean geargan go jándora leat ruovttus ovdal go stáhtačalli kantuvrras válde oktavuođa. Bovdejedje deaivvadeapmái.

– Olgešbellodat dat lea lágidan dán deaivvadeame. Go válde oktavuođa ii lean go bidjalit fas Osloi, dadjá Jåma.

 

Lea mannan jođánit dan rájes go Jåma lea bidjan návccaid johtui. Moatti beaivvis son lea olahan olu.

– Lean válljen rivttes strategiija. Ohcalit stuorradikkepolitihkkáriid ja stuorra riikamediaid. Dát galgá gullot, dadjá Jåma.

 

Muhto gutni son ii loga gal váldit okto.

– Leat máŋggaid jagiid bargan boraspire- ja goaskinhástalusain. Eat livčče dákkár fuomášumi oažžut jus boazodoallit eai livčče juohkán govaid sosiálamediaid bokte. Ávžžuhan sin joatkit dahkamis dan dassái go ášši čovdo, dadjá Jåma.

-Almmuhus-