-Almmuhus-
SMÁVVAOĐĐASATDavvin váilu juohke njealját girkui báhppa

Davvin váilu juohke njealját girkui báhppa

-

-

Badjel 100 báhpavirggis Norgga girkuin váilot bargit. Davvin lea juohke njealját virgi ain rabas, dieđiha Davvi-Hålogalándda bismagoddi.

– Mii nagodit hávdádit sin geat eretvádjolit ja gásttašit mánáid. Eambbo mii eat nákce, searvegoddedoaimmat šaddet vuordit, muitala Olav Øygard, bisma Davvi-Hålogalándda bismagottis preassadieđáhusas.

Juohke jagi mannet 70 Norgga báhpa ealáhahkii, ja eai leat doarvái báhpat deavdit sin sajiid. Nu čálii Vårt Land golbma jagi áigi, iige dan rájes leat olus rievdan. Einnosteapmi lea nu ahte 2024:s leat Norggas 150 rabas báhppavirggit.

Heahtedilli

Doaresbealbáikkiin lea eambbo heahtedilli go stuora gávpogiin, duođašta Romssa duopmoproavás Stig Lægdene.

– Stuorámus hástalus lea ahte olusat mannet ealáhahkii, muitala son.

Lægdene ballá ahte jus eai nagot deavdit guoros virggiid, de eai nagot girkut čađahit hávdádemiid, vihahemiid ja gásttašemiid.

Árabut dán jagi mearridii Romssa Universitehta heaittihit teologiijaoahpu, go eai leat doarvái ohccit.

– Teologiijaoahppu ásahuvvui 1995:s, ja dan rájes ii leat go okta olmmoš juohke jagi čađahan oahpu, muitala UiT prorektor, Kathrine Tveiterås.

Dál leat sullii 1200 báhpa Norggas.

©NTB

-Almmuhus-